Kulolesibua 20 - Nouveau Testament en Kilega

Bekukanda Satana Miaka Kanunu.

¹ Nu namonine ku mugenzi agelile gansi kutuka muigulu, abezaga na mutandulua wa muzinga utanakuzinda, nu nei­koki inene mu kuboko kuage.

² Nu akatile nzoka nnene za kisimana, nzoka za wakalazi, Liabo u Satana, nu akandilue miaka kanunu,

³ nu amubikile mu muzinga utanakuzinda, nu aguzibile, nu abikile kamenyikilo gago, buno anavua kuengelela babilongo lingo, aba nu gakasila miaka kanunu; nu kusila kuazo buamutunganana ku­kandulua bindi bikeke.

⁴ Nu namonine ku bisumbi bia bukota, nu babo bekeide gabio, nu bakasilue buangato bua kusungia: nu namonine ku babo base­sagua matoe ku kabamba ka bulongeki bua Yesu, nu ku kabamba keidagi lia Kalaga, nu babano tabakumbamine nyama, aba kisusania kiazo, nu tababikilue kakengelezio ga malanga mabo nu mu kuboko kuabo; nubo babeide na kalamo, nu bangatile na Klisto miaka kanunu.

⁵ Nu bango bakuzi tabalamine lingo aba nu kusila kua zezo miaka kanunu. Lilino u iyukilo itangi.

⁶ Mbogimbogi nu kusililila ku wozo ukayuka muiyukilo itangi: lukuo lua mabili talukabangata; tondo bakaba basankoga ba Kalaga nu ba Klisto, nu bakangata nage mu zezo miaka kanunu.

⁷ Nu gakasila zezo miaka kanunu, Satana akakandulua mu kikio kikando,

⁸ nu akatuka buno engelele babilongo beli ku ndenge inazi za kisi, Goga nu Magoga, kubakundamania ku bita: nu ma­ganzo mabo meli anga misege za mu kitatenge.

⁹ Nu babakamine gantata ga bungulu bua kisi, nu batimbile kiziki kia basuagibua nu muino watundua: nu keiya katukile muigulu nu kabazikizie.

¹⁰ Nu wozo Liabo u Satana wabengelelaga eisilue mu kiziba kia keiya kikuguluminaga na kibiliti, umuli zezo nyama nu mule­ngania wa buza nuwe; nu bakababazibua musi nu kindi ku nkiko na nkiko zitanakuzinda.

Lusungio Lutanakuzinda.

¹¹ Nu namonine ku kisumbi kinene kia bukota kienga, nu wozo wabezaga wikile gakio, kisi nu meigulu biatinine malanga mage; nu bibio tabikamonekako lingo.

¹² Nu namonine ku bakuzi, banene nu bakeke; bemana lisa na kisumbi kia bukota; nu mikanda zakanduidue; nu ungo mukanda wakanduidue, uli wa kalamo: nu basungizie bakuzi ku bitondo biabezaga biasanzua mu mikanda, anga buabezaga misako zabo.

¹³ Nu kitatenge kiatumpuide bakuzi babezaga mukio; nu lukuo nu kiziki kia bakuzi (Hadese) biabasizie bakuzi babezaga mubio: nu na muntu na muntu na wasungizibue anga buabezaga misako zage.

¹⁴ Nu beisile lukuo nu kiziki kia bakuzi (Hadese) mu kiziba kia keiya. Luluno u lukuo lua mabili, lulo lua kiziba kia keiya.

¹⁵ Nu ndi muntu ntamoneka asanzua mu mukanda wa kalamo, nti eisua mu kikio kiziba kia keiya.