Kulolesibua 2 - Nouveau Testament en Kilega

Iyuki Liasanzilagua Ekelezia lia ku Efeso,

¹ Ku mugenzi wa ekelezia lia ku Efeso sanza bubuno: Ubuku­tenda wozo ukete zezo nkeninkeni mutuba kamo ku kuboko kua seidume, wozo ukutabanga munkatini mua bianikilo mutuba kamo bia olo:

² nizi makitilo mobe, nu mulimo wobe nu komanizia kobe, nu nizi buno ntukutundaga bantu babi, nu wagelekile babo beku­imanaga bune, Isue tuli basingua, nu tabelibo, nu wabamenyine buno, beli boza;

³ nu uli na komanizia nu wababedue ku kabamba keizina liane, nu ntuakutilue.

⁴ Tondo nili na bumozi kuguli, buno wasigile lutundo luobe lutangi.

⁵ Bubo kengela gawagide, nu iyanie nu kukita lingo makitilo mobe matangi; tondo ndi ntuakita bubo, navue kuguli, nu kutikia kianikilo kiobe mu kiziki kiakio, ndi ntuiyania.

⁶ Tondo uli na bumozi busoga, buno ukusomba maki­tilo ma baNikoloa, mamo mankusomba.

⁷ Wozo uli na matuzi makunguilila, onguilile bukutenda Muuza Wasililila ku maekelezia. Wozo ukakindaga, nkamulisia ku muti wa kalamo uli mu Paladiso wa Kalaga.

Iyuki Liasanzilagua Ekelezia lia Semuna.

⁸ Nu ku mugenzi wa ekelezia lia ku Semuna sanza bubuno: ubukutenda wozo mutangi nu muzinda, wozo wabezaga wakua nu kano kaluma eli na kalamo:

⁹ nizi kabebe kobe, nu buzambi bobe (tondo uli mugumi), nu bilingano bia babo bekuitenda buno beli baYuda, nu tabelibo, tondo beli ba numba za musanganano za Satana.

¹⁰ Ntukue boba ku bunsania buwababazibue; unguilila, wozo Liabo, u Satana abike bamozi ba kumuli mu kikando, buno mugelekue; nu mukaba na kabebe ku bindi ikumi. Ube muka­tizia aba nu ku lukuo, nunne nkakukasa nkumbu za bukota za kalamo,

¹¹ Wozo uli na matuzi makunguilila, onguilile bukutenda Muuza Wasililila ku maekelezia. Wozo ukakinda ntakababazibua na lukuo lua mabili.

Iyuki Liasanzilagua Ekelezia lia Pegamo.

¹² Nu ku mugenzi wa ekelezia lia ku Pegamo sanza bubuno: ubukutenda wozo uli na bupanga bukusesaga ntungo ibili:

¹³ Nizi gokuikalaga, uga kisumbi kia bukota bua Satana; nu ukuanza izina liane, nu ntuananine bukatizio buane, aba mu bindi bia Anitipasa, mulongeki wane, mukatizia, eitilue kueinyu, gago gekuikalaga Satana.

¹⁴ Tondo nili na bumozi kuguli, kubuno kuli bantu bamozi bekuyanga meigisia ma Balama, wozo weigisizie Balaka buno akikitanie bana ba Isalele, buno balie bia ku tuyulo tua nkisi nu buno bakite butazi.

¹⁵ Bubo, kuli bango bamozi bekuyanga meigisia ma baNikoloa.

¹⁶ Iyanie; ndi ntuiyania nasasie kuvua kuguli, naluane nabo na bupanga bua kanua kane.

¹⁷ Wozo uli na matuzi makunguilila, onguilile bukutenda Muuza Wasililila ku maekelezia. Wozo ukakindaga nkamukasa mana mabisilue, nu nkamukasa ikozi lienga, nu geikozi gasanzua lingo izina liteizi ungo muntu, umpanga wozo walikasilue.

Iyuki Liasanzilagua Ekelezia lia Tuatila.

¹⁸ Nu ku mugenzi wa ekelezia lia ku Tuatila sanza bubuno: Ubukutenda Muana wa Kalaga, wozo eli na meiso masusania anga ngulumina za keiya, nu masindi mage meli anga nsubi zakisimana.

¹⁹ Nizi makitilo mobe, nu kutunda kobe nu bukatizio bobe nu kukasia kobe nu komanizia kobe, nu makitilo mobe mazinda matinga matangi.

²⁰ Tondo nili na bumozi kuguli, ukuitabizia wozo muki­kulu Yezebeli, ekuimana buno, eli mulengania mukikulu; nu eku­igisia bakobe bane nu kubengelela buno bakite butazi, nu kulia bia ku tuyulo tua nkisi.

²¹ Nu namukasile nkungu buno eyanie; nu ntakutunda kuiyania ku butazi buage.

²² Unguilila, nkamubika ga mugu, na babo bakuita meiga nage bakababazibua nunse, ndi tabakuiyania makitilo mabo.

²³ Nu nkeita bana bage mpimpimpi; nu maekelezia mansania makamenya buno nowozo ukulolaga mitima nu menge; nunne nkakasa muntu na muntu anga gegezie makitilo mage.

²⁴ Tondo nkumubula inyue basigeide mu Tuatila, bansania beteli na meigisia mamo, nu batamenyine kakungu kabi ka Satana, anga bubakutenda buno; nsikamuekia ungo muzigo.

²⁵ Tondo kokomeziazi kimuli nakio aba nu ganavue.

²⁶ Nu wozo ukakindaga, nu kulanga makitilo mane aba nu ku kuzinda, nka­mukasa buangato bua kuangata baBilongo:

²⁷ nuwe akabangata na kasusu ka kiuma, anga buli nyungu za mubumbi zikubugibua bibebibe; anga bunakasilue na Tatane.

²⁸ Nunne nkamukasa lukenikeni lua nindunindu.

²⁹ Wozo uli na matuzi makunguilila, onguilile bukutenda Muuza Wasililila ku maekelezia.