Kulolesibua 17 - Nouveau Testament en Kilega

Kisugo Kikusugua Mukikulu Kitazi Nunse.

¹ Nu umozi wa ku zezo migenzi mutuba kamo zabezaga na bituma mutuba kamo avule, nu antendile bune, Vua kuno, nikulolesie lusungio lua mukikulu kitazi nunse wikile gantata ga mazi meingi;

² nu bakota ba kisi bakitaga butazi na wozo, nu babo beikile ga kisi bakule na maku ma butazi buage.

³ Nu wanekile mu magala ma Muuza mu kalula: nu namonine ku mukikulu eikala ga­ntata ga nyama za kisimana, na meina ma bilingano, abezaga na matoe mutuba kamo nu mega ikumi.

⁴ Nu mukikulu avualikizibue na nsulu za pulupele nu za kisimana, nu alebizibue na olo nu makozi ma bukunza bubibu nu pelele ningi, nu abezaga na kituma kia olo mu kuboko kuage kiyazibua na bitondo bibi, bia nsese za butazi buage,

⁵ nu ga malanga mage gabezaga izina liasanzua bune, KEINDA, BABULONA MUNENE, NINA WA BIT AZI NU WA BITONDO BIBI BIA GA KISI.

⁶ Nu namonine ku mukikulu akua na mikila za basuagibua, nu mikila za balongeki ba Yesu. Ganamu­lolile, nangamine nunse.

⁷ Nu mugenzi wambuide bune, Kikizi kikukuangamia? Nkukubula buisulilua bua keinda ka mukikulu, nu ka nyama zikumueka, zili na matoe mutuba kamo nu mega ikumi.

⁸ Nu nyama ziwamonine kuzo zabezagako nu taziliko; nu zise buigi kubasa mu muzinga utanakuzinda; nu zikuenda ku buzimizi. Nu beikile ga kisi ku babo batasanzilue meina mabo mu mukanda wa kalamo kutukila kulinga kua kisi, bakangama kumona ku nyama zabe­zagako, nu taziliko, nu zikabako.

⁹ Bubuno buli menge ma bume­nyino. Matoe mutuba kamo meli miduko mutuba kamo, gago geikile mukikulu:

¹⁰ nu bakota mutuba kamo beliko; batano bakule, nu umozi ekiliko, nu ungo ntevua; nuwe gakavua akeikala bindi bimozi.

¹¹ Nu nyama zabezagako, nu taziliko, eli mukota wa kinana, nu eli wa mutuba kamo; nu ekuenda ku buzimizi.

¹² Nu mega ikumi mamuamonine kumo meli bakota ikumi, nubo tabekasua bukota buabo; tondo bakasua buangato anga bakota, nkungu emozi na nyama.

¹³ Nubo beli na luango lumozi, nu bekukasa magala mabo nu buangato buabo ku zezo nyama.

¹⁴ Nu bakaluana bita na Muana wa Mukoko, nu Muana wa Mukoko akabakinda, kubuno we eli Mukota wa bakota, nu Muangati wa bangati; nu bantu beli nage ubabo bamaninue, nu basombolua, nu bakatizia, bakakinda nage.

¹⁵ Nuwe ambuide bune, Mazi mawamonine kumo, mukikulu kitazi eikile gamo, meli bantu, nu misanganano za bantu, nu babilongo, nu ba mitendezi.

¹⁶ Nu mega ikumi mawa­monine kumo, nu nyama, bakasomba wozo mukikulu kitazi, nu bakamubenga nu kumuenzia mundulu, nu bakalia misuna zage, nu bakamuzikia na keiya.

¹⁷ Kubuno Kalaga abikile bubuno mu mitima zabo kukita anga buakutunda, nu babe mutima umozi, nu kukasa bukota buabo ku nyama, aba nu gazindilile malagano ma Kalaga.

¹⁸ Nu wozo mukikulu uwamonine kueli eli muino munene, uli na buangato ku bakota ba kisi.