Kulolesibua 16 - Nouveau Testament en Kilega

Tubebe Mutuba Kamo Tukamonekako.

¹ Nungule kuiyuki inene liatukile ku numba za kukumbamina liatendile ku migenzi mutuba kamo bune, Endazi, mukubule bituma mutuba kamo bia bongua bua Kalaga ga kisi.

² Nu mutangi endile, nu akubuide kituma kiage ga kisi; nu kuabeide biulu bibibu ku bantu babo babezaga na kakengelezio ka nyama, nu bakumbaminaga kisusania kiazo.

³ Nu wa babili akubuide kituma kiage mu kitatenge; nu kiabeide mikila anga za kitumba; nu binsania biabezaga na kalamo mu kita­tenge, biakule.

⁴ Nu weisatu akubuide kituma kiage mu nuzi nu mu tunua ba­longo tua mazi; nu mabeide mikila.

⁵ Nu nongule ku mugenzi wa mazi watendile bune, Uwe uli wisanana, uliko nu wabezagako, uwe Wasililila, kubuno wasungizie bubo:

⁶ kubuno babasizie mikila za basuagibua nu za balengania, nu uwe wabakasa mikila buno bazinue: nu batananina bubo.

⁷ Nu nongule kayulo katendile bune, E, Mukota Kalaga, uli na Magala, nsungio zobe zili bulili nu zisa.

⁸ Nu weinazi akubuide kituma kiage ga kisongo kia busi; nu kiakasilue magala kugisia bantu na keiya.

⁹ Nu bantu bagide na muzuzo mubibu; nu balingile izina lia Kalaga uli na buangato ku tubebe tuto; nu tabeiyanizie aba kumuganuna.

¹⁰ Nu weitano akubuide kituma kiage ga kisumbi kia bukota kia nyama; nu bukota buazo buabeide kapilo; nu batakuine ndami zabo kubuno bababalagua,

¹¹ nu balingile Kalaga wa kuigulu ku kubabalua kuabo nu ku biulu biabo; nu tabeiyanizie ku misako zabo.

¹² Nu wa mutuba akubuide kituma kiage mu luuzi lunene, Ufalate; nu mazi mabezaga mulo makamine, buno kube nzila za bakota bakutukaga kukutukaga kisongo kia busi.

¹³ Nu namo­nine mu kanua ka nzoka nnene za kisimana, nu ka nyama, nu ka wozo mulengania wa buza, muatuka miuza isatu za nsese, zasusania biula:

¹⁴ kubuno zili miuza za basumbu zikukitaga migeleko; ziku­endaga kuli bakota ba kisi kinsania, kubakundamania ku bita bia busi bunene bua Kalaga uli na Magala.

¹⁵ (Unguililazi, nkuvua anga muibi. Mbogimbogi ku wozo ukukesia ntende, nu ukukunga nsulu zage, kubuno we ntende mundulu, nu bantu tabamukange.)

¹⁶ Nu babakundamanizie babasambikile mu kiziki kikumanua mu kiEbelo buno Hamagedo.

¹⁷ Nu wa mutuba kamo akubuide kituma kiage mu muuza mu mpelela; nu iyuki inene liatukile mu numba za kukumbamina, liatukile ku kisumbi kia bukota, liatendile bune, Buasila kuba:

¹⁸ nu mikenzi, nu moki, nu mikulumino biabezaga; nu kuabede kalingini kanene ku kisi, takubezaga kalingini anga kako, na geikalide bantu ga kisi, kalingini kanene nu kabibu.

¹⁹ Nu muino munene wabeganizibue mu bindi bisatu, nu mino za babilongo zaguide: nu Babulona munene wakengelagua na Kalaga, kukasua kituma kia maku ma bongua buage.

²⁰ Nu bisanga binsania biabombile, nu miduko tazamonekileko.

²¹ Nu mbula nnene za lubula, nu luzitu anga kilo makumi manazi nu bibili, luatukaga muigulu nu kuko­lokela bantu; nu bantu balingile Kalaga ku kabamba ka kabebe ka mbula za lubula; kubuno kabebe kakano kabezaga kanene nunse.