Kulolesibua 15 - Nouveau Testament en Kilega

Migenzi Mutuba Kamo nu Tubebe Mutuba Kamo,

¹ Namonine ku kango kakengelezio muigulu, kanene nu kakuangamia: migenzi mutuba kamo zili na tubebe mutuba kamo tua kuzinda, kubuno kuto bongua bua Kalaga bukuzindilila.

² Nu namonine anga kitatenge kili anga kiyolo kiatopulua na keiya; nu babo bakindi ba nyama, nu kisusania kiazo, nu ku maganzo meizina liazo, bemana ga kitatenge kili anga kiyolo, beli na zenze za Kalaga.

³ Nubo bekuimbaga luimbo lua Mose mukobe wa Kalaga, nu luimbo lua Muana wa Mukoko, bekutenda bune, Mukota Kalaga uli na Magala; milimo zobe zili minene nu za kuangamia. Uwe Mukota wa babilongo bansania, nkita zobe zisanana nu za bulili.

⁴ Nazi utekukukua boba, Mukota, nu nazi utanaganuna izina liobe? Kubuno uwenyene uli wasililila; kubuno babilongo bansania bakakukumbamina; kubuno misako zobe zisanana zamonekileko.

⁵ Nu kusila kua bubo namonine, nu numba za kukumbamina za nsulu za bulongeki muigulu zeiguidue:

⁶ nu zezo migenzi mutuba kamo zili na tubebe mutuba kamo zatukile mu zezo numba za kukumbamina, nu zavualikizibue makozi ma bukunza bubibu, menga nu mekukelima, zakandua ku bibunda na mikoma za olo.

⁷ Nu kibumbua kimozi kia bibio binazi bili na kiakasile migenzi mutuba kamo bituma mutuba kamo bia olo biyala na bongua bua Kalaga ukulamaga nkiko na nkiko zitanakuzinda.

⁸ Nu numba za kukumbamina ziyazizibue na muki ku kabamba ka lutanuno lua Kalaga, nu magala mage; nu takuli muntu wavuamine kuingila mu numba zezo, aba nu gakasila tubebe mutuba kamo tua migenzi mutuba kamo.