Kulolesibua 14 - Nouveau Testament en Kilega

Muana wa Mukoko Emana ga Muiduko wa Siona.

¹ Nu namonine ku Muana wa Mukoko emana ku muiduko wa Siona, nu bantu babezaga tununu lukama makumi manazi nu tunazi babezaga nage, babezaga neizina liage, nu izina lia Isi, masanzua ga malanga mabo.

² Nu nungule kuiyuki liatukile mu­igulu, anga kubila kua kiliza kia mazi meingi, nu anga kukulumina kua mukulumino munene; nu nongule kuiyuki liabezaga anga batuti ba zenze bekuimba na zenze zabo:

³ nu beimbaga lungo luimbo luto lisa na kisumbi kia bukota, nu lisa na bibumbua binazi bili na kalamo nu bakulu: nu takuabezaga muntu wizi kuiyigisia luimbo luluno umpanga babo tununu lukama makumi manazi nu tunazi, nubo baku­nzilue ga kisi.

⁴ Babano bantu ubatamenyine bakikulu; kubuno beli anga bikumi bitemenyua na bamulume. Babano beli bantu bekuyangaga Muana wa Mukoko kunsania kua kuendaga. Baku­nzilue ku bantu, buno babe biguma bitangi ku Kalaga nu ku Muana wa Mukoko.

⁵ Nu tabekile buza: kubuno tabeli na matondoki.

Moki Manazi Matukaga Muigulu.

⁶ Nu namonine ku ungo mugenzi walengile muigulu, wabezaga na musagu musoga utanakuzinda kusambala ku beikile ga kisi, nu ku babikanga bansania nu ku babilongo bansania nu ku ba mitendezi insania nu ku bantu bansania;

⁷ nu atendile neiyuki inene bune, Kuazi Kalaga boba, nu muganunazi; kubuno nkungu za lusungio luage zakuka: nu kumbaminazi we wabumbile igulu nu kisi nu bitatenge nu tunua balongo.

⁸ Nu ungo mugenzi weibili, wayangile, nu watendile bune, Wagoa, wagoa Babulona, muino munene, wanusizie babilongo bansania maku ma bongoa bua butazi buago.

⁹ Nu ungo mugenzi weisatu, wabayangile, watendile neiyuki inene bune, Ndi muntu ekukumbamina nyama nu kisusania kiazo, nu kubikua kakengelezio ga malanga mage, aba ku kuboko kuage,

¹⁰ we nuwe, akanua maku ma bongoa bua Kalaga, mase­mbilue nu tamatopuidue na kansembia mu kituma kia bongoa buage; nu akababazibua mu keiya nu kibiliti buno migenzi basuagibua nu Muana wa Mukoko babamoneko:

¹¹ nu muki wa keiya wa kuba­bazibua kuabo ukuitumuka aba ku nkiko na nkiko zitanakuzinda; tabakumunua musi nu kindi, babo bakumbamine nyama nu kisusania kiazo, nu unsania ukabikua kakengelezio keizina liage.

¹² Bubuno buli komanizia ka basuagibua, babo bekuanzaga maka­kizio ma Kalaga, nu bukatizio bua Yesu.

¹³ Nu nongule kuiyuki liatukile muigulu liatendile bune, Sanza, Mbogimbogi ku bakuzi bekukua mu Mukota kutukila kano kaluma: ubukutenda Muuza Wasililila buno, bomunue ku milimo zabo; nu misako zabo zibayanga.

Kongua kua Kalaga.

¹⁴ Nu namonine ku kimpa kienga; nu gantata gakio gabezaga muntu wasusania muana wa muntu, abezaga na nkumbu za bukota za olo kuitoe liage, nu bupanga bukali bua kukola buabezaga ku kuboko kuage.

¹⁵ Nu ungo mugenzi watukile mu numba za kukumbamina walalukile neiyuki inene ku wozo wabezaga gantata ga kimpa bune, Isa bupanga buobe bua kukola buno ukole; kubuno nkungu za kukola zakuka; kubuno matubulo ma kisi mela.

¹⁶ Nu wozo wabezaga gantata ga kimpa eisile bupanga buage ga kisi; nu kisi kiakolilue.

¹⁷ Nu ungo mugenzi watukile ku numba za kukumbamina zili muigulu, nuwe wabezaga na bupanga bukali bua kukola.

¹⁸ Nu ungo mugenzi watukile ku kayulo, u wozo uli na buangato bua keiya; nu walalukile neiyuki inene ku wozo wabezaga na bupanga bukali bua kukola bune, Isa bupanga bobe bukali bun kukola, nu ukole bisosolo bia biguma bia kisi kubuno biguma biakio biela nunse.

¹⁹ Nu wozo mugenzi eisile bupanga buage bua kukola ga kisi, nu akolile biguma ku muzigi wa ga kisi, nu abibikile mu kilunga kinene kia bongua bua Kalaga.

²⁰ Nu bakambutuide biguma mu kilunga kuisula lia muino, nu mikila zatukile mu kilunga, zatutile kuba ningi aba nu ku mizigi za kusondelezia mpunda, ku bulazi buazo buli ku kilometele nkama isatu nu makumi mabili.