Kulolesibua 13 - Nouveau Testament en Kilega

Nyama Nkali Zatukile mu Kitatenge Kinene.

¹ Nu emanine geisege lia kitatenge. Nu namonine ku nyama zatukile mu kitatenge, zabezaga na mega ikumi nu matoe mutuba kamo, nu zabezaga na nkumbu za bukota ikumi ga mega mazo, nu ga matoe mazo gabezaga gasanzua meina ma kulinga Kalaga,

² Nu nyama zinamonine kuzo zasusania ngozi, nu ma­bumbu mazo mabezaga anga mabumbu ma nyama za ulu, nu kanua kazo kabezaga anga ka kimbue: nu nzoka nnene za kisimana zamukasile magala mage, nu kisumbi kiage kia bukota, nu buangato bunene.

³ Namonine kuitoe limozi liazo anga liasumitua kiulu; nu kiulu kiazo kia lukuo kionine; nu ba ga kisi bansania bangamine nu bayangile nyama;

⁴ nu bakumbamine nzoka nnene za kisi­mana, kubuno zakasile nyama buangato buazo, nu bakumba­mine nyama, batendile bune, Nazi wasusania nyama zeno? nu nazi unavuama kuitana nazo?

⁵ nu zakasilue kanua ka kutenda bitondo binene nu bilingano bia kulinga Kalaga; nu zaka­silue buangato kuangata miezi makumi manazi nu ibili.

⁶ Nu zalimbuide kanua kulinga Kalaga, nu kulinga izina liage, nu numba zage za kukumbamina, nu beikile muigulu.

⁷ Nu zakasilue magala buno zitane na basuagibua, nu kubakinda: nu zakasilue buangato kuangata babilongo bansania, nu bantu, nu ba mitendezi insania nu ba bikanga binsania.

⁸ Nu bansania beikile ga kisi bakaziku­mbamina, muntu unsania uteli neizina liasanzua mukulinga kua kisi mu mukanda wa kalamo wa Muana wa Mukoko wasesilue.

⁹ Wozo uli na matuzi makunguilila, onguilile.

¹⁰ Ndi muntu ekubika ungo ku bukobe, nuwe nti akaba mukobe; ndi muntu akuita ungo na bupanga, nuwe nti aketua na bupanga. Bubuno buli komanizia, nu bukatizio bua basuagibua.

Nyama Nkali Zikatuka Mubilongo.

¹¹ Nu namonine kuingo nyama zidolesizie mu kisi; nu zabezaga na mega mabili, anga muana wa mukoko, nu zatendile anga nzoka.

¹² Nu zangatile na buangato bunsania bua zezo nyama ntangi buzakitaga ku meiso mazo. Nu akitizie kisi nu bansania beli ga kisi kukumbamina nyama ntangi, zabezaga na kiulu kia lukuo kionine.

¹³ Nu zikakita migeleko minene, kuti­kia keiya muigulu nu ku keisa gansi buno bantu bakamoneko.

¹⁴ N u kuengelela bantu beli ga kisi ku kabamba ka migeleko zizakasilue kukita buno zezo nyama zimone; nu zikubabula bekuikala ga kisi, buno bakite kisusania kia nyama zabezaga na kiulu kia bupanga nu zalamine.

¹⁵ Nu zakasilue magala ma kuipila muuza mu kisusania kia nyama, buno kisusania kia nyama kitende, nu bansania batakukumbamina kisusania kia nyama beitue.

¹⁶ Nu zakakizizie bansania, bakeke nu banene, bagumi nu bazambi, bakandulua nu bakambi, buno babikue kakengelezio ku kuboko kuabo kua seidume, aba ga malanga mabo;

¹⁷ takuli muntu unavuama kukunza aba kukunzia, ndi nteli na kako kakengelezio, u izina lia nyama aba maganzo meizina liage.

¹⁸ Bubuno buli menge. Wozo uli na bumenyinino, aganze maganzo ma nyama; kubuno meli maganzo ma muntu: nu maganzo mazo meli nkama mutuba makumi mutuba nu mutuba.