Kulolesibua 12 - Nouveau Testament en Kilega

Kitondo kia Mukikulu nu Afuana Wage nu Nzoka Nnene za Kisimana.

¹ Nu kakengelezio kanene kamonekileko muigulu; mukikulu avualikizibue kisongo kia busi, nu muezi kunsi kua magulu mage, nu nkumbu za bukota za nkeninkeni ikumi nu ibili gantata geitoe liage;

² nuwe abezaga neiyimi; abezaga ekulila, abeide na lubaba lua kubuta, nu kabebe kebuta,

³ Nu kango kakengelezio kamonekileko muigulu: nzoka nnene za kisimana, zabezaga na matoe mutuba kamo nu mega ikumi, nu nkumbu za bukota mutuba kamo gantata ga matoe mazo.

⁴ Nu mukila wazo wabulutile kindi kimozi kia bisatu kia nkeninkeni za muigulu, nu zazikolokezie ku kisi: nu nzoka nnene za kisimana zemene lisa na mukikulu wabezaga ukubuta, buno alie muana gamubute.

⁵ Nuwe abutile muana wamulume, ukangata babilongo na musumbo wage wa kiuma: nu muana wage azanzuidue kuigulu ku Kalaga, nu ku kisumbi kiage kia bukota.

⁶ Nu wozo mukikulu atinine mu kalula, muli kiziki kiamulongekide Kalaga, buno bamulisie kuko bindi kanunu kamozi nkama ibili nu makumi mutuba.

⁷ Nu bita binene biabezaga muigulu; Mikaele nu migenzi zage beiteine na nzoka nnene za kisimana; nu nzoka nnene za kisimana nu migenzi zage beiteine nabo;

⁸ nu tababakindile, aba nu kiziki kiabo takiamonekile lingo kukio muigulu.

⁹ Nu nzoka nnene za kisimana zalekedue gansi, zezo nzoka za wakalazi, zikumanagua buno, Liabo u Satana, muengelezi wa kisi kinsania; zalekedue ku kisi, nu migenzi zage.

¹⁰ Nu nungule kuiyuki inene muigulu, liatendile bune, Kano kaluma lonio, nu magala, nu bukota bua Kalaga weitu, nu buangato bua Klisto wage biseli: kubuno musongezi wa mibuto zeitu ekubasongelaga ku Kalaga weitu busi nu kindi alekedue gansi.

¹¹ Nubo bamukindile ku kabamba ka mikila za Muana wa Mukoko, nu ku kabamba keidagi lia bulongeki buabo; nubo tabeidemanine.

¹² Bubo bogazi-­bogazi, meigulu nuinyue bekuikalagamo. Kabebe ku kisi, nu ku kitatenge: kubuno Liabo u Satana agela kumuli, nu eli na bongua bunene, kubuno eizi nkungu zage zise buigi.

¹³ Nu gamonine nzoka nnene za kisimana buno zalekelua ga kisi, zasungizie mukikulu wabutaga muana wamulume.

¹⁴ Nu wozo mukikulu akasilue biupi bibili anga biupi bia ndiu nnene, buno alenge mu kalula ku kiziki kiage, kialisibagua nkiko isatu nu kindi kia nkiko buno abe bulazi na zezo nzoka.

¹⁵ Nu nzoka zabasizie mazi mu kanua kazo anga luuzi, kumbusa kua wozo mukikulu, buno amukokie mu lulo luuzi.

¹⁶ Nu kisi kiakasizie mukikulu, nu kisi kiasuide kanua kakio nu kianune luuzi luatukaga mu kanua ka nzoka.

¹⁷ Nu nzoka nnene za kisimana zongedue wozo mukikulu, nu zendile kuitana bita na kikanga kiage kiasigede, kikuanza makakizio ma Kalaga, nu kili na bulongeki bua Yesu.