Kulolesibua 10 - Nouveau Testament en Kilega

Mugenzi Abezaga na Mukanda Mukeke.

¹ Nu namonine ku ungo mugenzi mubibu watukaga muigulu; avualikizibue kimpa; nu mumpilinda wabezaga geitoe liage, nu malanga mage mabezaga anga kisongo kia busi, nu masindi mage mabezaga anga ngulumina za keiya;

² nu abezaga na mukanda mu­keke wakandulua mu kuboko kuage: nu abikile kugulu kuage kua seidume mu kitatenge, nu kugulu kuage kuaseikazi ku kisi;

³ nu alalukile neiyuki inene, anga kugoluma kua kimbue: nu galalukile neiyuki mikulumino mutuba kamo zakulumine.

⁴ Nu gakulumine mikulumino mutuba kamo, nabezaga nise buigi kusanza: nu non­gule kuiyuki liatukile muigulu liatendile bune, Bika kamenyikilo ku bitondo bikukulumina mikulumino mutuba kamo, nu ntubisanze.

⁵ Nu wozo mugenzi unamonineko wemana ga kitatenge nu ga kisi asakikile kuboko kuage kua seidume kuigulu;

⁶ nu alumbide ku wozo ukulamaga ku nkiko na nkiko zitanakuzinda, wozo wabumbile igulu nu binsania bilimo, nu kisi nu binsania bili mukio, nu kitatenge nu binsania bilimo, buno ntalindile lingo limbizi:

⁷ tondo mu bindi bibio bia iyuki lia mugenzi wa mutuba kamo, eseli buigi kuida monze, ukuzindilila kua kakungu ka Kalaga, anga musagu musoga wasamba­lide bakobe bage u balengania.

⁸ Nu iyuki linungule kulio lia­tukaga muigulu, liantendile bune, Enda, utole wozo mukanda waka­ndulua ku kuboko kua mugenzi wemana ga kitatenge nu ga kisi.

⁹ Nu nendile ku wozo mugenzi, namubuide bune, Nkase wozo mu­kanda mukeke. Nu ambuide bune, Gutole, nu gulie; nu wakuite lubaba munda, tondo mu kanua kobe wabe nse anga buki.

¹⁰ Nu natolile wozo mukanda mukeke ku kuboko kua mugenzi, nu nagu­lile; nu wabezaga anga buki mu kanua kane; tondo ganagumenine, nda zane zabede lubaba.

¹¹ Nu bambuide bune, Watunganana kulengania lingo ku bantu beingi nu ku babilongo nu ku ba mite­ndezi nu ku bakota.