I Timoteo 4 - Nouveau Testament en Kilega

Bango baKlisto Bekeidekanukia na Kalaga.

¹ Tondo Muuza ekutenda buligo, mu nkiko zakuzinda, buno bantu bamozi bedekanukie na bukatizio, kunguilila ku miuza za buengelezi nu ku meigisia ma basumbu,

² mu buengelezi bua bantu bekuekaga buza, tulenganio nti tuseli anga tuasisoa na kiuma;

³ bekunania buno bantu basonge, nu kubakakizia kugila idia, lia­bumbile Kalaga likatue ku kusima na babo bekukatizia nu beku­menya bulili.

⁴ Kubuno na kibumbua na kibumbua kia Kalaga nti kisoga, aba takuli kinasombua, ndi kiakatua ku kusima:

⁵ kubuno kiasuagibua neidagi lia Kalaga nu ku kusega.

Timoteo Idange Busoga.

⁶ Kungua wakengelezia mibuto zeitu bitondo bibino, nti wabe mukiti musoga wa Klisto Yesu, nu nti wagomie na malagi ma buka­tizio, nu ma meigisia masoga ma wigisizibue aba nu kano kaluma:

⁷ tondo somba misumo za bakungu ba bakikulu. Ikokomezie ku kuanza Kalaga:

⁸ kubuno kulonda magala ma mubili kuli kusoga, tondo kuanza Kalaga kuatinga bitondo binsania, kubuno kuli idagano lia kalamo ka kano kaluma, nu lia kako kakaba.

⁹ Uli musagu watananina kukatizibua nu watunganana kuitabizibua nunsania.

¹⁰ Ku bubuno tukukita mulimo nu tukuluana, kubuno tukulemanina Kalaga uli mulami, uli Monia wa bantu bansania, lebelebe wa babo bakatizia.

¹¹ Bibino ubikakizie nu ubigisie.

¹² Muntu ntakubenge buno uli muana; tondo ube kalolesio ku babo bakatizia, mu kutenda, nu mu muendezi, nu mu lutundo, nu mu kuisanana, nu mu bukatizio.

¹³ Aba nu ganavue, ba na komanizia ku kusoma, nu ku kuana, nu ku kuigisia.

¹⁴ Ntusige lukaso luguli nalo, luwakasilue ku bulengania, ku kubikua kua maboko ma bakulu.

¹⁵ Ukengele bitondo bibino, wikale mubio; buno misako zobe zisuage ku bantu bansania.

¹⁶ Widange uwenyene, nu ku meigisia mobe; bikitage; kubuno ku kukita bubuno wiyonie uwenyene, nu bango bongule ku meigisia mobe banona.