I Timoteo 2 - Nouveau Testament en Kilega

BaKlisto Basekele Bantu Bansania.

¹ Umpanga nkulinga kuana, buno musege, nu kusega na komanizia, nu kusima, nu kusegela bantu bansania;

² bakota nu bansania beli na buangato; tulame nabo kalamo kola nu ka bubo­belelo mu kuisanana nu kubota.

³ Bubuno buli busoga nu bua­suaga ku Kalaga Monia weitu;

⁴ ukutunda bantu bansania bonibue, nu kuba na bumenyinino bua bulili.

⁵ Kubuno kuli Kalaga umozi tugu, nu mukulumania umozi gasamba Kalaga nu bantu, muntu wono u Klisto Yesu,

⁶ wikasene wenyene buno akulule bansania; u bulongeki bualongekilue ku nkungu zezo;

⁷ ku bubo nabikilue buno nibe musambazi nu musingua (nkutenda buligo, nsikueka buza), musozi wa baBilongo mu bukatizio nu bulili.

Bakikulu Babe na Luanzo mu Numba za Kalaga.

⁸ Umpanga nkutunda bamulume basege ku kiziki na kiziki, ku­lambia maboko masuaga, geteli bongoa nu miango.

⁹ Nu bubo, bakikulu bidebie na nsulu zabatananina nu beikue nsoni, nu kui­sungula; ta ku kusuika nzuili, aba olo, aba makozi ma bukunza, aba nsulu za bukunza bubibu;

¹⁰ tondo (anga buatananina bakikulu bekuitenda buno bekuanza Kalaga) babe na makitilo masoga.

¹¹ Mukikulu eibotie mu kuiga na luanzo lunsania.

¹² Tondo nsiakasa mukikulu buangato bua kuigisia aba kuangata wamulume, tondo eibotie.

¹³ Kubuno Adama uwalingile kubumbua, kuzinda Eva;

¹⁴ nu Adama ntengeledue, tondo mukikulu uwengeledue nu agile:

¹⁵ tondo akonibua mu kubuta, ndi beikala mu bukatizio nu lutundo nu kusuagibua nu kuizugila.