I Batesolonike 3 - Nouveau Testament en Kilega

Paolo Ekubasingila Timoteo Buno Abalindie.

¹ Umpanga ku bubuno gatutavuamine kuikalila ku bubo, tua­tundile buno tusigale tubenyene ku Atene;

² nu tuasingile Timoteo, mubuto weitu, mukiti wa Kalaga mu musagu musoga wa Klisto, buno amulindie, nu amubobelezie mu bukatizio bueinyu;

³ nu muntu ntatengetenge na mbabazio zeno; kubuno inyue benyene muizi buno tuabikilue ku bitondo bibino.

⁴ Kubuno gatuabezaga kueinyu, tualingile kumubula buno tukababazibua; anga bubo buabede, nuinyue muamenyine.

⁵ Ku bubuno nunne, gansiavuamine kuikalila ku bubo, nasingile muntu buno nimenye buni buli bukatizio bueinyu, buno mulindiki, anavua kumulindika, nu mulimo weitu unavua kuba bulia.

⁶ Tondo gatukile Timoteo kueinyu, atuvuilide na musagu musoga wa bukatizio bueinyu nu lutundo lueinyu, nu buno mukutukengelaga bindi binsania, muku­tunda nunse kutumonako, anga butukutunda nuisue kumumonako;

⁷ ku bubo, mibuto zeitu, tuabezaga na mbabazio nu nsungio ningi, tondo gatungule ku musagu wa bukatizio bueinyu tuabogilebogile:

⁸ kano kaluma tuli na kalamo, ndi muimana na magala mu Mukota.

⁹ Kubuno kusima kukizi kutukusima Kalaga ku kabamba keinyu, ku mbogimbogi insania zituli nazo kumuli ku Kalaga weitu;

¹⁰ tuku­segaga nunse musi nu kindi buno tumumoneko, nu kutalikila bingo bitondo bimuidile mu bukatizio bueinyu?

Paolo Ekubasegela ku Kalaga.

¹¹ Umpanga Kalaga wenyene Tateisue, nu Mukota weitu Yesu Klisto, batusondelezie buno tubase kueinyu:

¹² nu Mukota amu­kuzie nu kumuitizia mu lutundo bueinyu bueinyu, nu ku bantu bansania, anga bubo butuli nuisue kumuli;

¹³ bubo alindie mitima zeinyu geteli mabingo mukusililila ku Kalaga Tateisue, mu nkungu za kuvua kua Mukota weitu Yesu Klisto na basuagibua bage bansania.