I Batesolonike 2 - Nouveau Testament en Kilega

Gabezaga Paolo mu Muino Wabo, Abalolesizie Bitondo Bisoga.

¹ Kubuno inyue benyene, mibuto zeitu, muamenyine gatuabasile kueinyu, tatuavuaga buliabulia:

² tondo gatualingile kuba­bazibua, nu kubengua ku Filipo, anga bumuizi, tuabezaga na magala mu Kalaga weitu kumusambalila musagu musoga wa Kalaga mu lubanza lunene.

³ Kubuno kuana kueitu takuli ku buengelezi, aba ku nsese, aba ku kukanga:

⁴ tondo anga butuitabizibue na Kalaga tusambale musagu musoga, uwono utukusambala; ta kutananizia bantu, tondo Kalaga ukulindika mitima zeitu.

⁵ Kubuno tatui­tananizizie aba busi bumozi, anga bumukumenya, aba nsiabezaga mpusia, Kalaga eli mulongeki;

⁶ aba tatualondile kuganunua na bantu, aba neinyue, aba nu bango, tatuikakile buno tuli basingua ba Klisto.

⁷ Tondo tuabezaga tuola kumuli, anga bukulelaga mulezi alela bana bage:

⁸ bubo, nuisue tuamulemanine nunse, tatuamu­sambalide musagu wa Kalaga tugu, tondo nu tuikasene tubenyene, kubuno muli batundua beitu.

⁹ Kubuno, mibuto zeitu, muku­kengela milimo zeitu; tuakitaga milimo bindi binsania, kubuno tatuatundaga kumukikitania, tuamusambalide musagu musoga wa Kalaga.

¹⁰ Inyue muli balongeki, nu Kalaga nuwe, muizi anga butuabezaga basuagibua kumuli inyue bekukatizia, nu beisanana, geteli kubingua:

¹¹ kubuno anga butuamuanine anga isi wa bana ekuana bana bage, nu kumubobelezia, nu kumuigisia, nu kumu­longekela,

¹² bubo kitazi anga bakiti ba Kalaga wamumanine buno muingile mu bukota buage nu mu lutanuno luage.

Paolo Ekubogaboga ku Magala Mabo ku Kalaga.

¹³ Ku bubuno tukusimaga Kalaga bindi binsania, kubuno, gamuasambalidue idagi lia Kalaga, lituamusambalide nu limua­menyine taliabezaga idagi lia bantu, tondo idagi lia bulili, idagi lia Kalaga likumulindia inyue bekukatizia.

¹⁴ Kubuno inyue, mibuto zeitu, muayangile maekelezia ma Kalaga mu Klisto Yesu meli mu Yudaya; kubuno inyue muababazizibue na bantu ba kilongo kimozi kieinyu, bitondo bimozi bibababazizibue na ba Yuda;

¹⁵ beitile Mukota Yesu nu balengania, nu batupumbizie, tondo tabatanani­zizie Kalaga, nu beli beiti ba bantu bansania;

¹⁶ batuzugide buno tatutende na baBilongo, banavua kona, bubuno misako zabo za buagi zitilile: tondo Kalaga abongedue.

Paolo Ekutunda Kumonana Nabo.

¹⁷ Tondo isue, mibuto zeitu, tualekanuka neinyu ku nkungu nkeke, nti tukukengelana, nu nti tukutunda tuamonanako:

¹⁸ ku­buno tuatundaga kuvua kumuli, nne Paolo, mambizi meingi; tondo Satana atubigene.

¹⁹ Kubuno kilemanizio kietu, aba mbogimbogi zeitu, aba nkumbu za bukota nu za kuikaka zili kikizi? ndi teinyue ku Mukota weitu Yesu Klisto mu nkungu zakuvua kuage?

²⁰ Kubuno inyue muli lutanuno lueitu nu mbogimbogi zeitu.