I Bakolinto 7 - Nouveau Testament en Kilega

Paolo Ekusambalila Bantu Kitondo kia Isonga.

¹ Ku bitondo bibio biwansanzide: Buli busoga wamulume ntetu­bie ku mukikulu.

² Tondo, ku kabamba ka butazi, na muntu na muntu abe na mukikulu wage wenyene, nu mukikulu na mukikulu abe neiba wage wenyene.

³ Iba akase mukikulu wage bulili buage: nu bubo bubo mukikulu akase iba wage bulili buage.

⁴ Mukikulu nteli na buangato ku mubili wage wenyene, tondo iba wage: nu bubo bubo iba nteli na buangato ku mubili wage wenyene, tondo mukikulu wage.

⁵ Tamusumbilizanie anga batagomania, ndi tamuitabizia bumozi nkungu, buno mube na nkungu za kusega nu kumbusa nti muagomania, buno Satana anavua kumulindika buno mugilane.

⁶ Tondo nkutenda tugu bubo, takukakizia.

⁷ Kubuno ninatunda bantu bansania babe anga bundi, tondo na muntu na muntu eli na lukaso luage wenyene lukutukaga ku Kalaga, wono bubo nu wozo bubo.

⁸ Tondo nababula babo batesonga nu misigala bune, Bunaba busoga beikale anga bundi.

⁹ Tondo ndi tabanavuama kuikala tabasongua, aba tabasonga, nti basongua, aba nti basonga: kubuno buli busoga kusonga aba kusongua bubatanaba na lutundo.

¹⁰ To­ndo babo basila kusongana nabakakizia aba tanne: tondo Mukota, mukikulu ntatuke kuiba

¹¹ (tondo ndi atuka, nti ikala ntaso­ngua, aba agomanie lingo neiba); lingo wamulume ntatikie muki­kulu wage.

¹² Tondo ku bango bantu namubula, nne, ta Mukota; Ndi mubuto umozi eli na mukikulu utakatizia, nu mukikulu wono akuitabizia kuikala nage, ntamutike.

¹³ Nu mukikulu ndi eli neiba utakatizia, nu ndi wamulume wono ekutunda kuikala nage ntamusige.

¹⁴ Kubuno wozo wamulume utakatizia asuagibua mu mukikulu wage nu wozo mukikulu utakatizia asuagibua muiba wage; songo ta bubo songo bana beinyu banabede ta basuagibua, tondo kano kaluma beli basuagibua.

¹⁵ Tondo ndi wozo utakatizia atuka nti atuke: ugago mubuto wamulume aba mubuto mukikulu ntakandua; tondo Kalaga atumanine ku bubobelelo.

¹⁶ Kubuno ukumenya buni, uwe mukikulu, embe unonia iba wobe? aba uku­menya, uwe wamulume, embe unonia mukikulu wobe?

¹⁷ Tondo, anga buabeganizie Kalaga ku muntu na muntu, anga buamanine Mukota muntu na muntu, ububo wende, nu bubo bunkukakizia mu ekelezia na ekelezia lia Klisto.

¹⁸ Ndi muntu umozi amaninue nuwe abezaga asila kumonesibua? nteidolesie buno ntamonesizibue. Ndi muntu umozi amaninue nuwe ntamonesibua? Umpanga ntamonesibue.

¹⁹ Kumonesibua ta kena, nu kutamonesibua ta kena; tondo kukatizia makakizio ma Kalaga.

²⁰ Na muntu na muntu ikale mu lukita luabezaga nalo gamaninue.

²¹ Ndi wa­maninue ku bukobe; ntutende buno, Tabusoga; tondo ndi wakandulua, nti wakita bubo.

²² Kubuno we wamaninue mu Mukota eli mukobe, eli mukandulua wa Mukota: nu bubo we wamaninue eli mukandulua, eli mukobe wa Klisto.

²³ Inyue muakunzilue ku bukunza; tamube bakobe ba bantu.

²⁴ Mibuto zane, na muntu na muntu ikale mu lukita luamaninue na Kalaga.

Ku Kitondo kia Busimba Bakikulu Batemenya Bamulume.

²⁵ Ku bakikulu batemenya bamulume nsili neikakizio lia Mukota: tondo nkumubula tugu, anga buankuilide Mukota kiombo buno nibe mukatizia.

²⁶ Bubo bunkukengela buli busoga ku kabamba ka kabebe katuli nako, buno buli busoga ndi muntu ikale anga bueli.

²⁷ Ndi wakandua na mukikulu? ntulonde kukandulua. Ndi wakandulua na mukikulu? ntulonde mukikulu.

²⁸ Tondo ndi wasonga, nti ntuagile; ndi mukikulu asongua wozo nti ntagile. Tondo akababazibua mu mubili: nu ninatunda kumubembukia na zeno.

²⁹ Tondo nkutenda bubuno, mibuto zane, nkungu zako­koka, kutukila kano kaluma babo beli na bakikulu babe anga beteli nabo;

³⁰ nu babo bekulila, anga batakulila; nu babo bekuboga­boga, anga batakubogaboga; nu babo bekukunza, anga beteli na kampa;

³¹ nu babo bekulemanina kisi kikino, anga batakukile­manina nunse: kubuno bitondo bia kisi kikino bikutingaga.

³² Tondo nsikutunda muabilemanina. We utasonga ekukengela bitondo bia Mukota, buno atananizie Mukota:

³³ tondo we waso­nga akukengela bitondo bia kisi kikino buno atananizie mukikulu wage.

³⁴ Lingo buengukana gasamba mukikulu nu kikumi. Wozo utasongua akuidangia mu bitondo bia Mukota, asililile mu mubili nu muuza: tondo wozo wasongua akuidangia ku bitondo bia kisi kikino, lukita luanatananizia iba wage.

³⁵ Nkutenda bubuno ku mutali weinyu; nsikumuengelela, tondo ku kabamba ka bibio bikutananizia, mukitile Mukota kuteli kubulutua na bingo bitondo.

³⁶ Tondo ndi muntu ekukengela buno ntekukitila kikumi kiage busoga, ndi atinga nkungu za bukinga buage, nu ekutunda kusongua, akite anga buekutunda; ntakita buagi; basongane.

³⁷ Tondo we walindia mutima, nu ntiyanina, tondo avuama kuangata kusombola kuage wenyene lingo, ekukengela mu mutima wage, kulanga kikumi kiage, akita busoga.

³⁸ Umpanga, ukusongia kikumi kiage ekukita busoga; nuwe utakukisongia nti akita busoga nunse.

³⁹ Mukikulu akandua ndi iba ekili na kalamo; tondo ndi iba akua, nti akandulua buno asongue na unsania watunda; tondo mu Mukota tugu.

⁴⁰ Tondo eli na mbogimbogi nunse, ndi ikala anga bueli, anga bunabula: nunne nkukengela buno nili na Muuza wa Kalaga.