I Bakolinto 6 - Nouveau Testament en Kilega

Ba Kikanga kia Klisto Tabasongelane ku Bangati ba Buliabulia.

¹ Muntu mukizi kumuli, ndi eli na kitondo na munyage, ta busoga kumubinga ku babo bateisanana, tondo ku basuagibua?

² Aba ndi tamuizi buno basuagibua bakasungia kisi? Nu ndi kisi kikasungibua neinyu, buni bumutanamenya kusungia ku bitondo bikeke?

³ Ndi tamuizi buno tukasungia migenzi? embe ku bingo bitondo?

⁴ Umpanga ndi gamukusesaga milondo za kisi kikino, ndi mukumanaga babo batakumenyua mu ekelezia?

⁵ Nkutenda kitondo kikino buno nimuitie na nsoni. Ndi buli bubo, ndi kumuli takuli muntu umozi gunasesa milondo za mibuto zage,

⁶ tondo mukubingana bueinyu bueinyu ku babo batakatizia?

⁷ Lebelebe, kano kaluma mukulungia nunse, kubuno mukubingana bueinyu bueinyu. Ndi tamunagilua? Kubuni bumutakuziga munyague bikulo bienyu?

⁸ Tondo, inyue mukuagilaga bantu, nu kuiba bikulo biabo, ubibio bia mibuto zeinyu.

⁹ Aba ndi tamuizi buno bateisanana tabakapiena bukota bua Kalaga? Tamuengelelue: aba bitazi, aba bakukumbaminaga nkisi, aba beiti ba meiga: aba beli bua mukikulu, aba bakukita buteli anga bumba bua bantu,

¹⁰ aba beibi, aba bekutonia, aba banuzi ba maku, aba balingani, aba bakukangaga, tabakapiena bukota bua Kalaga.

¹¹ Nu bubo nuinyue muabezaga mu lulo lukita, tondo muasugilue, tondo muabikilue basuagibua, tondo muabingizibue muizina lia Mukota Yesu Klisto, nu mu Muuza wa Kalaga weitu.

Mibili Zeitu Zili Zasililila.

¹² Ninavuama kukita binsania; tondo binsania tabinaba bisoga kundi. Ninavuama kukita binsania; tondo nsikangatua na kimozi.

¹³ Malia meli ku kitondo kia nda, nu nda zili ku kitondo kia malia; tondo Kalaga akabigia bio bibili; nda nu malia. Tondo mubili taguli ku kitondo kia butazi, tondo ku kitondo kia Mukota; nu Mukota ku kitondo kia mubili:

¹⁴ nu Kalaga ayukizie Mukota, nu lingo akatuyukia ku magala mage wenyene.

¹⁵ Tamuizi buno mibili zeinyu zili biganza bia Klisto? ndi natole biganza bia Klisto, nu kubibika kuba biganza bia kitazi? kilo, aba nunse.

¹⁶ Aba ndi buno, we ukugomania na kitazi nti eli bumozi nage? kubuno, buatendilue bune, Babo babili babe mubili umozi.

¹⁷ Tondo we ukugomania na Mukota eli umozi nage mu muuza umozi.

¹⁸ Tinazi butazi. Ingo mibi insania zikukitaga muntu tazikubigia mubili wage: tondo we ukukitaga butazi ekubigia mubili wage we wenyene.

¹⁹ Aba ndi tamuizi buno mibili zeinyu zili numba za Muuza Wasililila uli munda mueinyu umuakasilue na Kalaga? nu tazili zeinyu;

²⁰ kubuno muakunzilue ku bukunza bunene; ububo ganunazi Kalaga mu mibili zeinyu.