I Bakolinto 5 - Nouveau Testament en Kilega

Paolo Ekubasungula ku Kitondo kia Kitazi kili Kubeli.

¹ Kukutendua nunse buno kuli bumania kumuli, nu bumania bubuno bua lukita luteli ku baBilongo, buno muntu alimbie mukazi weisi.

² Nuinyue mukuikotia, aba tamukuikongoboteka buno, atikibue kumuli wozo wakitile kitondo kikino.

³ Kubuno nne lebelebe, nsiligo ku mubili tondo niligo ku makengelo mane, nasungia kalazi wozo wakitile kitondo kikino anga buno niligo,

⁴ muizina lia Mukota weitu Yesu Klisto, gamuakundamanaga, na makengelo mane anga niligo, na magala ma Mukota weitu Yesu Klisto,

⁵ muntu wono akasanue ku Satana, buno mubili ubigibue, tondo muntu wono onibue mu busi bua Mukota Yesu.

⁶ Kuikaka kueinyu takusoga. Tamuizi buno, mugago mukeke ukugagagia bisubua binsania?

⁷ Mutikie wozo mugago mukulu, buno mube bisubua bito, anga bumuli tamuagagibua. Kubuno kayulo keitu keisuluko u Klisto:

⁸ umpanga tukite ikundamanino lilio, ta ku mugago mukulu, aba ku mugago wa kiango nu bubi, tondo ku bitagaga bia mutima wenga, nu bulili.

⁹ Namusanzide mu mukanda wane tamugomanie na bamania;

¹⁰ nsikutenda buno tamugomanie nunse na bamania ba kisi kikino, aba na bekutonia, aba na banyagi, aba na bakumbamizi ba nkisi; kubuno bubo bunamutunganana kutuka mu kisi kikino:

¹¹ tondo kano kaluma, namusanzila tamugomanie na muntu ukumanua mubuto ndi eli mumania, aba ekutonia, aba mukumbamizi wa nkisi, aba mulingani, aba munuzi wa maku, aba munyagi; muntu wa lukita luluno tamuzige kulia nage.

¹² Kubuno nili na buangato bukizi nibasungie babo beteizi Klisto? Nuinyue tamukusungia babo beli mu Klisto?

¹³ Tondo babo beteizi Klisto, Kalaga akabasungia. Tikiazi wono muntu mubi kumuli.