I Bakolinto 4 - Nouveau Testament en Kilega

¹ Muntu atulole, buno tuli bakiti ba Klisto, nu balangi ba tukungu tua Kalaga.

² Tondo, lingo buatunganana balangi, buno muntu na muntu abe mukatizia.

³ Tondo ta kitondo kinene kundi kusungibua neinyue, aba kusungibua ku bantu: aba nsikuisu­ngia nnenyene.

⁴ Kubuno nnenyene nsizi bunisungia, tondo kitondo kikino takinambingia, tondo we ukunsungia u Mukota.

⁵ Umpanga tamusese mulondo wampa mu nkungu zago, aba nu gavue Mukota, ukalolesia bitondo binsania ku kiengi bibio biakita­gua mu kapilo, nu kubisula nango za mitima; nu ku nkungu zezo na muntu na muntu akakasua ku Kalaga luganuno luamutananina.

Paolo Ekubalolesia Bubekubenga Basingua.

⁶ Bitondo bibino, mibuto zane, nabikitile kuba kisusania kiane nu kia Apolo ku kabamba keinyu, buno ku musagu weitu muige kutasuluka biasanzilue; nu muntu umozi nteikotie ku munyage.

⁷ Kubuno eli nazi ukukuanzukania nongo? nu kikizi kiutakasilue? tondo ndi wakasilue, buni bukuikaka anga ntuakasilue?

⁸ Muikuta kalazi, muaguma kalazi, muangata kalazi anga bakota ga tuteli: bunabede busoga songo muangatile, buno nuisue tunangata neinyu.

⁹ Kubuno, nkukengela, buno Kalaga atubikile tube basingua bazinda, anga bantu bakusungibua buno beitue; kubuno tuseli tulolesio ku kisi, nu ku migenzi nu ku bantu.

¹⁰ Isue tuli bikongolo ku kabamba ka Klisto, tondo inyue muli na menge mu Klisto; isue tuatamba, tondo inyue muli na magala; inyue mukuganunua, tondo isue tukubengua.

¹¹ Aba nu nkungu zeno tukukua na nzala, nu mpusia, nu tuli mindulu, tukulibulua ngizi tatuli na biziki biakuikala;

¹² lingo tukukita milimo na mabokomeitu: nu tukulingua, nti tukukita mponga; tukubabazibua, nti tuikalila;

¹³ ndi tukukandikua, nti tuasega; tukukitua anga nsese za kisi, nu busasa bua binsania, aba nu kano kaluma.

¹⁴ Nsikusanza bitondo bibino buno nimuitie na nsoni; tondo nkumutonda anga bana bane banatunda.

¹⁵ Kubuno munabede na basozi tununu ikumi mu Klisto, tondo tamuli na basoinyue beingi; kubuno nne namubutile mu Klisto Yesu mu musagu musoga.

¹⁶ Umpanga nkumuana buno, mukite anga bunkukita.

¹⁷ Kububo namusingide Timoteo, muana wane unatunda, nu mukatizia mu Mukota, ukamulolesia misako zane zili mu Klisto, anga bunkuigisagia ku kiziki na kiziki mu ekelezia linsania lia Klisto.

¹⁸ Bamozi bekuikotia buno anga nsiavue kumuli.

¹⁹ To­ndo navue kumuli yiliyili, ndi Mukota aziga; nunne namenye ta kutenda kuabo beikotagia, tondo magala mabo.

²⁰ Kubuno bukota bua Kalaga tabuli mu kutenda, tondo mu magala.

²¹ Buni bumukutunda? nivue kumuli na kasusula; aba mu lutundo, nu mutima wabota?