I Bakolinto 16 - Nouveau Testament en Kilega

Paolo Ekubasambizia: nu Ekubakengelezia.

¹ Ku kitondo kia kukundamania mitebe ku kabamba ka basuagibua, anga bunakakizizie maekelezia ma Galatia, nuinyue mukite bubo.

² Mu busi butangi buizinga na muntu na muntu kumuli abike nkindi, anga buli mutali wage, buno takukaku­ndamanibua gankavua.

³ Nunne gankabasa, nkasinga babo bamukasombola na mikanda, beke mitebe zeinyu ku Yelusalema:

⁴ nu ndi buakulungana nunne kuendako, nti bende gamozi nanne.

⁵ Tondo navue kueinyu, ganatinge ku Makedonia; kubuno natinge ku Makedonia;

⁶ embe nikale kueinyu, nkungu za mpego, buno munelekezie ku lugendo luane kunkuenda.

⁷ Kubuno nsikutunda namumonako mu kutinga tugu; tondo nkulemanina kuikala kueinyu nkungu nkeke, ndi Mukota atunda.

⁸ Tondo nikale mu Efeso aba nu busi bua Pentekoste;

⁹ kubuno nigulilua luibi lunene luatana­nina nunse, nu basombi beli beingi.

¹⁰ Tondo ndi Timoteo avue, nti eikale neinyue ntakue boba; kubuno ekukitaga mulimo wa Mukota, anga bunkukita nunne:

¹¹ umpanga muntu unsania ntamubenge. Tondo mumuane na bubobelelo, buno avue kundi: kubuno nne nu mibuto zeitu tuku­mukika.

¹² Tondo ku kitondo kia Apolo mubuto weitu, namuse­ngizie nunse ende kumuli na mibuto zeitu: nuwe ntatundile nunsania kuenda kano kaluma; tondo ende gamone nkungu za kuenda.

¹³ Kikazi, lindazi mu bukatizio, mube bamulume, ikokomeziazi.

¹⁴ Bitondo bienyu binsania bikitue mu lutundo.

¹⁵ Kano kaluma, nkumusengezia, mibuto zane (muizi buno kikanga kia Setefano, kili kitangi kia Akaya, nu kio kibikile mu mulimo wa kukitila basuagibua),

¹⁶ umpanga anzazi bantu, anga babo, nu muntu na muntu ukukitaga mulimo gamozi nabo na magala.

¹⁷ Nunne nkubogaboga ku kuvua kua Setefano nu Fotunato nu Akaiko: kubuno babano basililizizie bunidile kumuli.

¹⁸ Kubuno balindizie mutima wane nu mitima zeinyu; umpanga kutiazi bantu anga babano.

¹⁹ Maekelezia ku Asia bamusambizia. Akuila nu Pilisikila bamusambizia nunse mu Mukota, nu ekelezia lili mu numba zabo.

²⁰ Mibuto insania zeitu bamusambizia. Sambizaniazi na mbogi­mbogi.

²¹ Zeno zili samba zane, nne Paolo, nowasanza.

²² Ndi muntu unsania ntelama Mukota, asuililue. Mukota weitu, uvue.

²³ Mponga za Mukota weitu Yesu Klisto zibe neinyue.

²⁴ Lutu­ndo luane lube neinyue bansania mu Klisto Yesu. Amena.