I Bakolinto 15 - Nouveau Testament en Kilega

Ku Kitondo kia Lukuo lua Yesu nu Kuyuka Kuage ku Bakuzi.

¹ Mibuto zane, nkumukengelezia musagu musoga unamusa­mbalide, wozo umuakatizizie muemana mugo,

² monibua mugo, ndi mualindika idagi Iinamusambalide, ndi tamuakatizizie buliabulia.

³ Kubuno nalingile kumusambalila musago mutangi bitondo binsania binasekede: buno Klisto akule ku kabamba ka buagi bueitu anga bukutenda masanzo;

⁴ nu ayikilue; nu ayukizibue kusila kua bindi bisatu anga bukutenda masanzo;

⁵ nu amonekileko na Kefa; nu na babo ikumi na babili;

⁶ kusila kua bubo amone­kileko na mibuto zage kutinga nkama itano, nu beingi beli beikiligo, bango bese bakua;

⁷ kusila kua bubo amonekileko na Yakobo; na basingua bansania;

⁸ nu kusila kua bansania, namumueineko, anga muntu wabutilue ta ku nkungu zage.

⁹ Kubuno nne nili mukeke nunse mu basingua, nsiatunganana kumanua musingua, kubuno nasungizie ekelezia lia Kalaga.

¹⁰ Tondo ku mponga za Kalaga nili buno bundi: nu mponga zage zili kundi tazabezaga buliabulia; tondo neitide nunse kukita mulimo kutinga babo bansania: aba tanne, tondo mponga za Kalaga zankasizie.

¹¹ U­mpanga ndi nne aba babo, ububo butukusambala, nuinyue muaka­tizizie.

Kuyuka Kua Yesu ku Bakuzi Kuli Kalolesio ka Bantu Bage.

¹² Umpanga ndi muasambalidue buno Klisto ayukizibue ku bakuzi, buni bukutenda bamozi kumuli buno takuli iyukilo lia bakuzi?

¹³ Tondo ndi takuli iyukilo lia bakuzi, nti Klisto nuwe ntayukizibue;

¹⁴ nu ndi Klisto ntayukizibue, kasi kusambala kueitu kuli buliabulia, nu bukatizio bueinyu buli buliabulia.

¹⁵ Nu lebelebe isue nti tuli anga bekueka Kalaga buza; kubuno tualongekede Kalaga buno ayukizie Klisto: watayukizie, ndi bakuzi tabakuyukibua.

¹⁶ Kubuno ndi bakuzi tabakuyukibua, kasi Klisto nuwe ntayukizibue:

¹⁷ nu ndi Klisto ntayukizibue, bukatizio bueinyu nti buli buliabulia; kasi mukikile mu buagi bueinyu.

¹⁸ Nu babo bakule mu Klisto kasi nti bazimina.

¹⁹ Ndi mu kalamo kakano kankanka tugu tuli na kilemanizio mu Klisto, isue tuli na kabebe kutinga bantu bansania.

²⁰ Tondo lebelebe Klisto ayukizibue ku bakuzi, nu abede mu­tangi wa babo bakule.

²¹ Kubuno anga bubo lukuo bulualusizibue na muntu, bubo nu iyukilo lia bakuzi lialusizibue na muntu.

²² Kubuno anga mu Adama bansania bekukuaga, bubo mu Klisto bansania bakalamibua.

²³ Tondo na muntu na muntu ku kiziki kiage; Klisto eli mutangi; kumbusa kuage babo beli ba Klisto, ku kuvua kuage.

²⁴ Nu kusila kua bubo kuli kuzinda, gakakasa bukota buage ku Kalaga Isi; gakatikia bukota bunsania nu buangato bunsania nu magala mansania.

²⁵ Kubuno we angate, aba gakabika beiti bage bansania kunsi kua magulu mage.

²⁶ Muiti muzinda ukabigibua eli lukuo.

²⁷ Kubuno we abikile binsania kunsi kua magulu mage. Tondo gakatenda buno, angatile binsania, tukumenya bune, we ntekutenda kulsi wamukasile binsania.

²⁸ Nu kungua angatile binsania, bubo, Muana akangatua nelsi wamu­kasile binsania, kubuno Kalaga akuangataga binsania.

²⁹ Babo bakubatizibua ku kabamba ka bakuzi bakite buni ndi bakuzi tabayukizibue nunse? Buni bubakubatizibua ku kabamba ka bakuzi?

³⁰ nuisue buni butukusungibua nkungu na nkungu?

³¹ Nunne, mibuto zane, kukuno ukuikaka kunkuikaka kumuli mu Klisto Yesu Mukota weitu, nkukuaga busi na busi.

³² Anga lukita lua bantu, ndi nitanine na nyama nkali ku Efeso, nti nili na mutali mukizi? Ndi bakuzi tabayukaga, kasi nti tulie nu tunue, kubuno lubi tuakue.

³³ Tamuiyengelele: mugomio mubi uku­bigia misako misoga.

³⁴ Yukazi mu menge meisanana, tamukite buagi; kubuno bamozi tabeli na bumenyinino bua Kalaga: nkute­nda bubo kumuitia na nsoni.

Bakuzi Bakayuka Buni?

³⁵ Tondo embe muntu umozi anatenda, buni bukuyukaga bakuzi? nu ku mubili mukizi ubavue?

³⁶ Uwe kikongolo, mbuto ziukuyikaga tazikuasaga ndi tazalinga kubola:

³⁷ nuzo ziuku­yikaga, ntukuziyikaga na lukita lukakola nazo, umpanga ka­guma tugu, embe za mumpunge, embe zingo nkita;

³⁸ tondo Kalaga ekuzikasaga mubili anga buakutunda, nu mbuto na mbuto wage mubili.

³⁹ Misuna insania tazili bumozi: tondo emozi za bantu, nu zingo za nyama, nu zingo za biena, nu zingo za tuzoni.

⁴⁰ Kuli mibili za muigulu, nu mibili za mu kisi: tondo malebo meli muigulu meli meme, nu malebo meli mu kisi meli meme.

⁴¹ Kuli malebo mamozi ma kisongo kia busi, nu mango malebo ma muezi, nu mango malebo ma nkeninkeni; kubuno lukenikeni luengukana na lungo lukenikeni ku malebo.

⁴² Bubo ubuli iyukilo lia bakuzi. Ukuyikua esabola; akayuka ntabola:

⁴³ ukuyikua na kanyego; ukayuka mu malebo: ukuyikua u kitu­mba; ukayuka na magala:

⁴⁴ ukuyikua mu mubili wa bumba, ukayuka mu mubili wa muuza. Ndi kuli mubili wa bumba nti kuli mubili wa muuza.

⁴⁵ Ububo buasanzilue bune, Muntu mutangi Adama abede mulami, Adama wa kuzinda abede muuza wa kukasana kalamo.

⁴⁶ Tondo tamutangi wozo wa muuza, tondo wa bumba; nu kumbusa wavua wozo wa muuza.

⁴⁷ Muntu mutangi eli wa kisi, atukile ku bilongo; muntu wa babili eli Mukota watukile kuigulu.

⁴⁸ Bubo bueli wa bilongo, ububo babo beli ba bilongo, nu anga buli we wa muigulu, ububo babo beli ba kuigulu.

⁴⁹ Nu anga butuekile lukita lua we wa bilongo, ububo tukeka lukita lua wa muigulu.

Yesu Atukindide Lukuo.

⁵⁰ Tondo bubuno bunkutenda, mibuto zane, buno mibili za bumba nu mikila tazinapiena bukota bua Kalaga; aba lukuo talunapiena kalamo.

⁵¹ Unguililazi, nkumulolesia kakungu: Ta­tukakua isue bansania, tondo isue bansania tukagalukibua,

⁵² ku kazanga kamozi, ku kukebia kua liso, nkungu za monze wa kuzinda: kubuno monze ukeidua, nu bakuzi bakayukibua tabakue lingo, nuisue tukagalukibua.

⁵³ Kubuno wono wabiga ntabige lingo, nu wozo mukuzi ntakue lingo.

⁵⁴ Tondo wono wabiga ntakabiga lingo, nu wono mukuzi ntakakua lingo, nkungu zezo zilikazindilila lilio idagi liasanzilue bune, Lukuo lukamenua na bukindi.

⁵⁵ E lukuo, kuni kuli kukinda kuobe? E lukuo, mutabo wobe uli kuni?

⁵⁶ Mutabo wa lukuo uli buagi: nu magala ma buagi meli mulembe:

⁵⁷ tusimazi Kalaga, ukutukasaga kukinda mu Mukota weitu Yesu Klisto.

⁵⁸ Umpanga, mibuto zane batundua, mulinde, tamutengetenge, muitile nunse kukita mulimo wa Mukota bindi binsania, mumenye buno mulimo weinyu taguli bulia mu Mukota.