I Bakolinto 14 - Nouveau Testament en Kilega

Menge ma Kuigisia Bantu Iyuki lia Kalaga Matinga Menge ma Kumenya Mitendezi Mingi.

¹ Yangazi lutundo; tondo mube na lutundo nunse lua nkaso za bumenyinino bua muuza, tondo kutinga nunse kule­ngania.

² Kubuno we ukutenda ku mutendezi ntekutenda na bantu, tondo ku Kalaga; kubuno takuli muntu ukungua; tondo ekutenda bitondo bia tukungu mu Muuza.

³ Tondo we ukulengania ekutenda na bantu bitondo bia kubalindia, nu kubana, nu kubabobelezia.

⁴ We ukutenda ku mutendezi ekuidindia; tondo we ukulengania ekulindia ekelezia.

⁵ Nne nkutunda inyue bansania mutende ku mitendezi, tondo kutinga nunse muigisie, kubuno wozo ukuigisia eli munene kutinga wozo ukutenda ku mutendezi, ndi ntisula, buno ekelezia lilinde.

⁶ Tondo, mibuto zane, ndi navua kumuli nu kutenda ku mitendezi, nti namuisulile buni, kungua nsikutenda bumukumenya, aba ku bumenyinino, aba ku bule­ngania, aba meigisia?

⁷ Aba binsania biteli na kalamo bili neiyuki, ndi monze aba zenze, ndi tabikutenda moki ma buisulilua, buni bunamenyininua nimbo zikuimbua na monze aba na zenze?

⁸ Kubuno ndi monze ukutenda iyuki litakumenyua, nazi unasanga wakunina bita?

⁹ Bubo nuinyue, ndi tamukutenda bukungubua, buni buamenyue bubo buatendagua? nti muli anga bekutenda buliabulia.

¹⁰ Kuli mitendezi za nkita ningi mu kisi, aba takuli umozi uteli na buisulilua.

¹¹ Nu ndi nsiamenya buisulilua bua wozo mutendezi, nti nili anga utemuizi nuwe abe anga utenizi.

¹² Bubo nuinyue, kubuno muli na lutundo lua nkaso za Muuza, londazi kuba nazo buno mulindie ekelezia.

¹³ Ku bubuno we ukutenda ku mutendezi asege buno eisule.

¹⁴ Kubuno ndi nkusega ku mutendezi, nti nkusega mu mutima wane, tondo bu­menyinino buane tabukumenyinina.

¹⁵ Umpanga buni bubo? Nasege mu mutima wane, nu nasege ku bumenyinino; nimbe na Muuza, nu limbe ku bumenyinino.

¹⁶ Kubuno uwe ndi ukuganuna mu mutima, we ukuikala mu kiziki kia uteizi buni buanitabizia Amena kungua wasila kuganuna, kubuno ntakumenya bukutenda?

¹⁷ Kubuno buligo uwe ukuganuna busoga, tondo wozo ungo ntakulindibua.

¹⁸ Nkuganuna Kalaga, kubuno nkute­nda ku mitendezi kumutinga inyue bansania:

¹⁹ tondo ninatunda kutenda moki matano mu ekelezia na menge mane, nigisie bango, kutinga kutenda moki tununu ikumi ku mutendezi.

²⁰ Mibuto zane, tamube anga bana mu bumenyinino bueinyu; tondo mube anga bana mu buagi, tondo mu bumenyinino mube bakulu banene.

²¹ Buasanzilue mu mulembe bune, Nkatenda na bantu babano ku bantu bengo mitendezi nu ku tunua tua bageni; nu tabakanungua, buatendile Mukota.

²² Umpanga, mitendezi zili kalolesio, ta kubabo bakatizia, tondo kubabo batakatizia: tondo bulengania buli kalolesio, ta kubabo batakatizia, tondo kubabo bakatizia.

²³ Ndi ekelezia linsania liakundamana nu bansania bekutenda ku mitendezi, nu kungua kuingila bango bantu beteizi wozo mutendezi, aba bango bantu batakatizia, ndi tabanatenda buno muli baluba?

²⁴ Tondo ndi bansania bekuigisia, nu ndi kuingila muntu utakatizia aba uteizi, nti ekubezibua na bansania, nu nti ekusungulua na bansania;

²⁵ nu bitondo biabezaga abisa mu mutima wage nti biamenyua; nu bubo nti agoe bukukama nu akumbamine Kalaga, nu nti atende bune, Buligo Kalaga eli neinyue.

Paolo Ekubakengelezia Bubakita Misanganano Zabo.

²⁶ Buni lingo, mibuto zane? Gamukukundamana, ndi muntu na muntu eli na luimbo, nu meigisia, nu kalolesio, nu mutendezi, nu buisulilua. Bitondo binsania bilindibue.

²⁷ Ndi muntu ekute­nda ku mutendezi, batende babili, aba basatu; umozi umozi atende; nu umozi nti isula:

²⁸ tondo ndi takuli umozi wa kuisula, nti ikala kibibi mu ekelezia; atende we wenyene ku Kalaga.

²⁹ Nu balengania batende babili aba basatu, nu bango nti bamenyinina.

³⁰ Tondo ndi ungo eli na kalolesio, wozo wa mutangi nti ikala kibibi.

³¹ Kubuno inyue bansania munavuama kulengania, umozi umozi, buno bansania beige, nu bansania beigisie;

³² nu miuza za balengania zikuanza balengania;

³³ kubuno Kalaga ta Kalaga wa mulubu, tondo wa bubobelelo. Anga mu maekelezia mansania ma basuagibua.

³⁴ Bakikulu beikale kibibi mu maekelezia: kubuno tabeli na buangato bua kutenda; tondo banze, anga bubo bukutenda mule­mbe.

³⁵ Nu ndi bekutunda kuiga bitondo, nti babuzie beiba babo bobenyene mu numba zabo: kubuno zili nsoni bakikulu kutenda mu ekelezia.

³⁶ Kikizi? idagi lia Kalaga ndi liatukile kumuli? Aba ndi liamubaside inyue benyene?

³⁷ Ndi muntu umozi ekukengela buno eli mulengania, aba eli na bumenyinino bua muuza, nti amenyinina bitondo bibino bina­musanzila, buno bili kukakizia kua Mukota.

³⁸ Tondo ndi muntu nteizi, nti abe kikongolo.

³⁹ Ku bubuno, mibuto zane, mube na lutundo nunse ku kule­ngania, nu tamuzugile kutenda ku mitendezi.

⁴⁰ Tondo binsania bikitue busoga nu anga buatunganana.