I Bakolinto 12 - Nouveau Testament en Kilega

Paolo Ekubasambalila Bitondo bia Nkaso za Muuza Wasililila.

¹ Ku musagu wa nkaso za bumenyinino bua Muuza, mibuto zane, nsikutunda inyue kutamenyinina.

² Muizi buno gamuabezaga baBilongo muendaga ku nkisi zitakutenda, anga bumuasondelezizibue.

³ Ku bubuno namumenesia bubo, takuli muntu uli na Muuza wa Kalaga unatenda buno, Yesu asuililua; nu muntu ntanavuama kutenda buno, Yesu eli Mukota, ndi ntekute­nda na Muuza Wasililila.

⁴ Kuli nkaso zengukana, tondo Muuza eli umozi.

⁵ Kuli milimo zengukana tondo Mukota umozi.

⁶ Kuli makitilo mengu­kana, tondo Kalaga umozi ukukita makitilo mansania mu bansania.

⁷ Tondo muntu na muntu ekukasua kalolesio ka Muuza kuba mutali ku bansania.

⁸ Kubuno muntu umozi ku Muuza ekukasua menge makutenda; nungo bumenyinino bua kutenda, ku Muuza wozo umozi:

⁹ nungo bukatizio, mu Muuza wozo umozi: nungo nkaso za konia, mu Muuza wozo umozi;

¹⁰ nungo kukita magala ma kuganiagania; nungo bulengania; nungo kumenyinina miuza (ndi wa Kalaga aba ndi wa Satana); nungo nkita za mitendezi; nungo kuisula mitendezi:

¹¹ tondo milimo zeno insania Muuza wono umozi ukuzikita, akukasanaga ku muntu na muntu anga buakutunda.

Bakatizia Beli Beingi, Tondo Beli Mubili Umozi.

¹² Kubuno anga bubo mubili uli umozi, nugo uli na biganza bingi, nu biganza binsania bia mubili wozo, nubio bili bingi, bili mubili umozi; bubo nubo ubuli Klisto.

¹³ Kubuno mu Muuza umozi isue bansania tuabatizizibue mu mubili umozi, ndi baYuda aba baGeleka, ndi bakandua aba bakandulua; isue bansania tuanusizibue ku Muuza umozi.

¹⁴ Kubuno mubili takiganza kimozi, tondo bingi.

¹⁵ Ndi kugulu kunatenda bune, Nne nsili kuboko, nsili wa mubili; ndi ku kitondo kikio takuli kua mubili?

¹⁶ Ndi kutuzi kunatenda bune, Nne nsili liso, nsili wa mubili; ndi ku kitondo kikio takuli kua mubili?

¹⁷ Songo mubili unsania uli liso, buni bugununguagile? Songo unsania uli kutuzi, buni bununguagilue iyugo?

¹⁸ Tondo Kalaga abikile biganza ku mubili, anga buatundile.

¹⁹ Tondo songo binsania bili kiganza kimozi, songo mubili unabede buni?

²⁰ Tondo kano kaluma biganza bili bingi, tondo mubili uli umozi.

²¹ Nu liso talinavuama kubula kuboko nsiniyanina uwe: aba lingo itoe talinavuama kubula magulu, nsikuiyanina inyue.

²² Tondo, biganza bia mubili biakengelagua biatamba nunse, bikuiyaninagua:

²³ nu bibio biganza bia mubili, bitakukengelua kuanzua, u biganza bitukuanza nunse; nubio biteli bisoga bikuanzua busoga nunse;

²⁴ kubuno biganza bietu bili busoga tabikuiyaninana; tondo Kalaga akulu­mizizie mubili, nu kukikasa luanzo kikio kiganza kieidile;

²⁵ buno mubili tagubeganibue; tondo biganza bilangane.

²⁶ Nu kiganza kimozi ndi kiababalua, biganza binsania nti biababalua nakio; nu ndi kiganza kimozi kianzua, bingo binsania nti biabogaboga nakio.

²⁷ Kubuno inyue muli mubili wa Klisto, nu nakio nakio nakili buage.

²⁸ Nu Kalaga abikile bamozi mu ekelezia, mutangi basi­ngua, wa babili balengania, wa basatu basozi, nu magala ma kuga­niagania, nu nkaso za konia basambi, nu bakasia, nu buangato, nu nkita za mitendezi.

²⁹ Ndi bansania beli basingua? Ndi bansania beli balengania? Ndi bansania beli basozi? Ndi bansania bekuki­taga magala ma kuganiagania?

³⁰ Ndi bansania beli na nkaso za konia basambi? Ndi bansania bekutendaga mitendezi? Ndi bansania bekuisulaga mitendezi?

³¹ Tondo mutunde nunse nkaso nsoga. Nu lingo nkumulolesia buatinga bubo.