I Bakolinto 11 - Nouveau Testament en KilegaEkubasambalila Makitilo ma Bakikulu mu Numba za Kalaga. 1 Kitazi, anga bunasusananizie Klisto. 2 Lingo namuganuna kubuno muankengela mu binsania, nu muakokomezia bunsania anga bunamusambalide. 3 Tondo nkutunda mumenye buno, muangati wa wamulume na wamulume eli Klisto; nu muangati wa mukikulu eli wamulume; nu muangati wa Klisto eli Kalaga. 4 Na wamulume na wamulume ukusega aba kulengania, ndi ekukila itoe, nti abenga muangati wage. 5 Tondo na mukikulu na mukikulu ukusega aba kulengania, itoe taliakukilua, nti abenga muangati wage; kubuno eli bumozi na wozo walulua. 6 Kubuno ndi mukikulu ntekukila, kasi nti alulue nunse: tondo ndi buli nsoni mukikulu kualulua nzuili zage, aba kukegia, kasi nti akukilue. 7 Kubuno tabuatunganana wamulume kukukila itoe, kubuno eli kisusania nu lutanuno lua Kalaga: tondo mukikulu eli lutanuno lua wamulume. 8 Kubuno wamulume ntatukile ku mukikulu; tondo mukikulu ku wamulume: 9 aba wamulume ntabumbilue ku kabamba ka mukikulu; tondo mukikulu ku kabamba ka wamulume: 10 ku bubuno buatunganana mukikulu abe na kakengelesio ka luanzo kuitoe liage, ku kabamba ka migenzi. 11 Tondo lingo, mukikulu ntanaba nteli na wamulume, aba wamulume ntanaba nteli na mukikulu, mu Mukota. 12 Kubuno anga bubo mukikulu atukile ku wamulume, bubo wamulume nuwe, akubutagua na mukikulu; tondo binsania bikutukaga ku Kalaga. 13 Kengelazi mubenyene, ndi buatananina mukikulu kusega Kalaga nu ntakukila itoe liage? 14 Ndi tamukukengela buno, kungua wamulume eli na nzuili ndazi, ndi nti tabubi? 15 Tondo ndi mukikulu eli na nzuili ndazi zili lutanuno kueli; kubuno akasilue nzuili kukukila itoe liage. 16 Tondo ndi muntu atunda kuenda miango, isue tatuli na lukita anga luluno, aba maekelezia ma Kalaga. Paolo Ekubasungula ku Kubigia Idia lia Mukota. 17 Mu kukakizia kukuno, nsikumuganuna, kubuno mu kukundamana ta ku busoga, tondo bubi. 18 Kubuno, kitondo kitangi kili ndi muakundamana mu ekelezia, nungua buno mualekanuka: nu nkubukatizia kakeke. 19 Kubuno nkukengela buno mualekanuka, buno babo basuagibua kumuli bamoneke. 20 Umpanga gamuakundamana takuli kukulia idia lia Mukota, 21 kubuno na muntu na muntu ukulinga kutola idia liage wenyene mu kuko kulia; nu umozi eli na nzala nu ungo akatua na maku. 22 Ndi tamuli na numba zeinyu za kulia muzo nu kunua? Aba mukubenga ekelezia lia Kalaga, mukubeitia na nsoni babo beteli na kena? Nkumubula buni P Ndi namuganuna ku bubuno? Nsikumuganuna. 23 Kubuno nakasilue na Mukota kikio kinamulusizizie, buno Mukata Yesu mu kindi kikio kiakasenue atolile kampampa: 24 nu gasilile kukakasa mponga, akabunguide, atendile bune, W ono uli mubili wane, wabungulua ku kabamba keinyu: kitazi bubuno bumukankengelaga. 25 Nu gasilile kulia, atolile kituma, atendile bune, kikino kituma kili idagano ito mu mikila zane; gamukanuaga, kitazi bubuno bumukankengelaga. 26 Kubuno gamukaliaga kampampa kakano, nu kunua kituma kikino, mukulolesia lukuo lua Mukota aba gakavua. 27 Umpanga unsania ukulia kampampa kakano aba kunua kituma kikino kia Mukota na lukita luteli lusoga, abe na katati ka mubili nu mikila za Mukota. 28 Tondo muntu idindike wenyene, nu bubo alie kampampa, nu anue kituma. 29 Kubuno wozo walia nu kunua, alia nu anua lusungio luage wenyene, ndi ntamenyinina mubili wa Mukota. 30 Ku kabamba kakano beingi kumuli batamba nu bekusamba nu bango besebakua. 31 Tondo ndi tukuiyania, nti tatunasungibua. 32 Tondo gatukusungibua, tukusungulua na Mukota, buno tatusungibue na bantu ba kisi. 33 Umpanga, mibuto zane, gamukukundamana kulia, mulindilane. 34 Ndi muntu eli na nzala, nti alia mu numba zage; buno tamukundamane ku lusungio. Nu bibio biasigala nkabilongeka gankavua. |
Nouveau Testament en Kilega © Bible Society of the Democratic Republic of Congo, 1957.
Bible Society of the Democratic Republic of Congo