I Bakolinto 1 - Nouveau Testament en Kilega

Mukanda Mutangi Wasingaga Paolo ku baKolinto. Paolo Ekusambizia baKolinto.

¹ Paolo amaninue buno abe musingua wa Yesu Klisto ku kusombola kua Kalaga, nu Sosetene, mubuto weitu,

² ku ekelezia lia Kalaga lili mu Kolinto, nu ku babo basuagizibue mu Klisto Yesu bamaninue buno babe basuagibua, nu bansama be­kusega Mukota weitu Yesu Klisto kuizina liage mu kiziki na kiziki, Mukota weitu nu wabo:

³ Mponga nu bubobelelo bikutukaga ku Kalaga Tateisue nu ku Mukota Yesu Klisto bibe kumuli.

⁴ Nkusimaga Kalaga wane bindi binsania ku kabamba keinyu, ku kitondo kia mponga za Kalaga zimuakitilue mu Yesu Klisto;

⁵ kubuno mu kitondo kinsania muagumizibue mueli, mu moki mansania nu menge mansania;

⁶ anga bulongeki bua Klisto buakokomezizibue kumuli:

⁷ ububo tamuidile lukaso luampa; mukulindila kuvua kua Mukota weitu Yesu Klisto;

⁸ nuwe amuh­ndie aba nu kuzinda, buno mubingibue mu busi bua Mukota weitu Yesu Klisto.

⁹ Kalaga eli mukatizia, wamumanme ku mugomio wa Muana wage Yesu Klisto Mukota weitu.

Paolo Ekubasungula ku Miango Zabo

¹⁰ Umpanga nkumusengezia, mibuto zane, kuizina lia Mukota weitu Yesu Klisto, buno inyue bansania mutende bitondo bimozi, tamuidekanukie; tondo mugomanie mu bumenyinino bumozi nu luango lumozi.

¹¹ Kubuno nasambalidue musagu weinyu, mbuto zane, na babo beli mu numba za Koloe, buno muli na mlango.

¹² Umpanga nkutenda kitondo kikino, buno muntu na muntu kumuli ekutendaga, buno nne wa Paolo; nunne wa Apolo; nunne wa Kefa; nunne wa Klisto.

¹³ Ndi Klisto abeganibua? Aba ndi Paolo atakilue ku kabamba keinyu? Aba ndi muabatizibue kuizina lia Paolo?

¹⁴ Nkusima Kalaga kubuno nsiabatizizie muntu kumuli, umpanga Kilisipo nu Gayo;

¹⁵ buno muntu anavua kutenda buno, wabatizizibue kuizina hane.

¹⁶ Nu lingo nabatizizie bantu ba kikanga kia Setefano; gantata ga babano, nsizi ndi nabatizizie ungo muntu.

¹⁷ Kubuno Klisto ntansingile kubatizia, tondo kusambala musagu musoga; aba ta ku menge ma moki, buno muti wa magu wa Klisto unavua kukegibua.

Menge ma Bantu Meli Bukongolo ku Kalaga.

¹⁸ Kubuno musagu wa muti wa magu ku babo bazimina buli bukongolo; tondo kuisue bonibua buli magala ma Kalaga.

¹⁹ Ku­buno buasanzilue bune, Nkabigia menge ma beli na menge, Nu nkasomba bumenyinino bua babo beli na bumenyinino.

²⁰ Nazi uli na menge? Nazi musanzi? Nazi uli na miango mu kisi kikino? Ndi Kalaga ntakitile menge ma kisi kikino buno mabe bukongolo?

²¹ Kubuno mu menge ma Kalaga kisi na menge makio, takiamenyine Kalaga, buatananizizie Kalaga konia babo bakatizia ku bukongolo bua busambazi.

²² Kubuno baYuda bekulondaga migeleko, nu baGeleka bekulondaga menge:

²³ tondo isue tukumusambalila musagu wa Klisto buno atakilue ku muti wa magu, eli ikitano ku baYuda, nu ku baBilongo eli bukongolo;

²⁴ tondo ku babo bekumanua, aba baYuda nu baGeleka, Klisto eli magala ma Kalaga, nu menge ma Kalaga.

²⁵ Kubuno bukongolo bua Kalaga buli na menge kutinga bantu; nu mutambo wa Kalaga uli na magala kutinga magala ma bantu.

²⁶ Kubuno kengelazi bumuamaninue, mibuto zane, buno ta beingi beli na menge ma kisi, ta beingi beli na magala, ta beingi beli na buangato bamanagua.

²⁷ Tondo Kalaga, asombuede bikongolo bia kisi kuitia beli na menge na nsoni; nu Kalaga aso­mbuede biatamba bia kisi, kuitia bili na magala na nsoni;

²⁸ nu Kalaga asombuede bikubigaga bia kisi, nu bikubengua, nu bitabezaga, buno bikegie bikuanzua:

²⁹ buno muntu unsania nteikake ku Kalaga.

³⁰ Tondo kueli inyue museli mu Klisto Yesu, wakitilue menge kutuli matukile ku Kalaga nu kuisanana nu kusuagibua, nu bukuluzi:

³¹ bubuno, anga buasanzilue bune, We ukuikaka, nti eikaka mu Mukota.