II Timoteo 4 - Nouveau Testament en Kilega

Moki Mazinda ma Paolo.

¹ Nkukukakizia ku Kalaga, nu ku Klisto Yesu, ukasungia balami nu bakuzi, nu ku kumoneka kuage nu ku bukota buage:

² sambala idagi lia Kalaga na komanizia nkungu ziukubogaboga, nu nkungu ziutakubogaboga, zugila, ana, sengezia ku kuikalila kunsania nu kuigisia.

³ Kubuno nkungu zikabasa gabatakaziga meigisia ma bulili; tondo, mu kuyanga ntundo zabo, bobenyene bakekungikila musanganano wa basozi kubuno bekutunda kunguilila meigisia mabi;

⁴ nubo tabakonguilila ku bulili, nu kugalukila misumo za buza.

⁵ Tondo uwe widange mu bitondo binsania, babazibua, kita mulimo wa kusambala, sililizia mulimo wobe unsania.

⁶ Kubuno nne nise neikasana anga kisansa, nu busi bua kukua kuane buse buigi.

⁷ Niteine bita bisoga; nasilile kantangoa kane; nalangile buka­tizio;

⁸ kusila kua bubo nabikidue nkumbu za bukota za kuisanana, zikankasa Mukota musungia wisanana busi bubo, aba ta nnenyene tugu, tondo nu babo bansania bekutunda kumoneka kuage.

Paolo Ekulaga Timoteo nu baKlisto.

⁹ Vua kundi yiliyili:

¹⁰ kubuno Dema ansigile, atundile bitondo bia nkiko zeno za kano kaluma, nu endile ku Tesolonike; nu Kulese­kene endile ku Galatia, nu Tito endile ku Dalumatia,

¹¹ Luka wenyene ugundi nage. Wavua na Malako; kubuno ekunkasagia busoga.

¹² Tondo nasingile Tukiko ku Efeso.

¹³ Gokuvua nti wavua neikoti linasigile kua Kalaupa ku Telua, nu mikanda, tondo lebelebe zezo mikanda za bikoba.

¹⁴ Alesandelo mutumbi wa nsubi ankitide bubi buingi: Mukota akamusungia ku bitondo biaki­taga:

¹⁵ nu uwe widange na wono; kubuno abengile nunse meigisia meitu.

¹⁶ Kuitenda itangi lia mulondo wane takuabezaga muntu umozi wantendede, tondo bansania bansigile: tabatekuidue kugo.

¹⁷ Tondo Mukota emanine nanne, nu ankasile magala; buno nisambale nunse musagu, nu baBilongo bansania nti bongua, nu nonezibue mu kanua ka kimbue.

¹⁸ Nu Mukota anonie ku kitondo na kitondo kibi, nu andusie ku bukota buage bua muigulu: nu kueli kuli lutanuno ku nkiko zitanakuzinda. Amena.

Bekusambizania.

¹⁹ Sambizia Puliseka nu Akuila, nu kikanga kia Onesipolo.

²⁰ Elaseto eikede ku Kolinto: tondo nasigile Tulopimo ku Mileto ekusamba.

²¹ Sasia kuvua nti nkungu za mpego tazika. Eubulo nu Pudento, nu Lino, nu Kulaudio, nu mibuto zeitu insania beku­kusambizia.

²² Mukota Yesu Klisto abe nobe. Mponga zibe kumuli.