II Timoteo 3 - Nouveau Testament en Kilega

Mu Bindi bia Kuzinda, Bantu Beingi Bakasomba Bitondo bia Kalaga.

¹ Tondo menya buno, mu bindi bizinda kukaba bitondo bibibu.

² Kubuno bantu bakeiyelama bobenyene, nu belami ba bikulo, nu baganuzi, nu bekuikotia, nu balingani, nu batakuanza bababuta, nu beteli na lusimo, nu batasuaga,

³ nu batakutunda bakuabo, nu batakutunda kusigilila bango, nu bakandiki, batakuisungula, nu bakali, batakutunda busoga,

⁴ nu bagabuzi, beli na kasasue keitenda, nu bekuikotia, nu bekutunda meiya kutinga Kalaga;

⁵ bekumoneka buno bekuanza Kalaga, tondo bekutuna magala mage; ntuikundiebo.

⁶ Kubuno bamozi ku babo bekuingila mu numba, nu kuenda na bakikulu bikongolo beli na mibi, basondelezizibue na ntundo mbi za nkita ningi,

⁷ bekuigisibua busi na busi, tondo tabanavuama kumenyinina bulili.

⁸ Anga Yane nu Yambule bubabengile Mose, ububo nu babano bakubenga bulili; bantu balubikeine menge mabo, batakuitabizibua ku bitondo bia bukatizio.

⁹ Tondo taba­keitila nunse: kubuno bukongolo buabo buamenyue na bantu bansania, anga buabezaga bua babo bango.

Timoteo Alindizie Mutima Wage ku Kitondo kia Kalaga anga Bualindizie Paolo.

¹⁰ Tondo uwe wamenyine meigisia mane, nu makitilo mane, nu makengelo mane, nu bukatizio buane, nu kuikalila kuane, nu lutundo luane, nu nkiki zane,

¹¹ nu kusungibua kunasungizibue ku Antiokia, nu ku Ikonia, nu ku Lusta; tondo Mukota anonezie ku binsania.

¹² Lebelebe, nu bansania bekuanzaga Kalaga mu Klisto Yesu baka­sungibua.

¹³ Tondo bantu babi nu tumanua bakanka kukita bubi bindi binsania, bekuengelela nu bekuengelelua.

¹⁴ Tondo uwe kita anga bubo buwigisizibue, nu bubo buwakatizizie, nu kumenya buno nazi wakuigisizie bubo;

¹⁵ nu buno kutukila buana buobe wamenyine masanzo masililila makukasanaga menge ma konibua ku bukatizio buli mu Klisto Yesu.

¹⁶ Masanzo mansania mopidue na Kalaga, nu meli masoga kuigisia, nu kuzugila, nu kusungula, nu kuigisia kuisanana:

¹⁷ buno muntu wa Kalaga alinde, nu asuage ku mulimo na mulimo musoga.