II Timoteo 2 - Nouveau Testament en Kilega

Babo Bekukita Busoga Bekubogiabogia Kalaga.

¹ Umpanga, uwe muana wane, ba na magala mu mponga zili mu Klisto Yesu.

² Nu binsania biwigile kundi ku balongeki beingi, igisiabio ku bantu bakatizia, bakavuama kuigisia bango.

³ Babazibua anga bunkubabazibua, anga mukoloboyo musoga wa Klisto Yesu.

⁴ Takuli mukoloboyo ukuitana bita ukuibika mu bitondo bia kisi; buno atananizie wozo wamusanzile buno abe muko­loboyo.

⁵ Aba muntu ndi ekuenda kantangoa, ntanakasua nkumbu, kungua ntatanga munyage.

⁶ Wozo ukulima atunganana kulinga kulia ku biakulima.

⁷ Kengela bubuno bunkutenda, kubuno Mukota akukase bumenyinino mu binsania.

⁸ Kengela buno Yesu Klisto, wa kikanga kia Davidi, ayukile ku bakuzi anga bukutenda musagu musoga wane:

⁹ mugo umunkubabazibua nu kukandua, anga muagi; tondo idagi lia Kalaga talikukandua.

¹⁰ Kubuno nikui­kalila binsania ku kabamba ka basombolua, buno nubo babe na lonio luli mu Klisto Yesu nu na lutanuno lutanakuzinda.

¹¹ Uli musagu watananina kukatizibua: kubuno ndi tuakule gamozi nage, nti tuka­lamaga gamozi nage:

¹² ndi tuikalila, nti tukangata gamozi nage: ndi tuamutuna, nuwe nti akatutuna:

¹³ ndi tatuli bakatizia, we nti eli mukatizia; kubuno ntanavuama kuituna wenyene.

BaKlisto Tabende Miango.

¹⁴ Bakengelezie bibino binsania, nu kubana ku Kalaga, tamuaka­nanie ku bitondo bitakulungana, nu bikubigia babo bakungua kubio.

¹⁵ Ikokomezie buno watananizia Kalaga, mukiti wa mulimo utekukua na nsoni, ukuigisia buisanana idagi lia bulili.

¹⁶ Tondo ibembukie na bitondo bitasuaga: kubuno bitondo bibino bikugalukia bantu buno tabanze Kalaga,

¹⁷ nu kutenda kuabo kuabe anga kiulu kinene kikuenda kiagagana mubili unsania: ba­mozi kubo u babano Umenayo nu Felito;

¹⁸ babano basigile bulili ku kutenda buno, iyukilo liabede kalazi, nu bagalukizie buka­tizio bua bantu bamozi.

¹⁹ Tondo kibanza kia Kalaga kili kibibu, nu kiemana, nu beli na kamenyikilo kakano, Mukota eizi beli bage: nu muntu unsania ukutekula izina lia Mukota, asige buteisanana.

²⁰ Tondo mu numba nnene tamuli nyungu za olo nu za feza tugu, tondo nu za miti nu zibumba; imozi za luanzo, nu ingo tazaluanzo.

²¹ Umpanga ndi muntu eiyengia nu kuidekanukia na bibino, nti akaba nyungu za luanzo, zasuagibua, zatananina Mukota, zalongekua ku mulimo na mulimo uli musoga.

²² Tondo siga ntundo za buana buto; nu uyange kuisanana, nu bukatizio, nu lutundo, nu bubobelelo, gamozi na babo bekusega ku Mukota na mitima misoga.

²³ Tondo somba mbuzio za bukongolo nu ziteli za menge, kubuno zikulusia nsake.

²⁴ Nu mukobe wa Mukota ntakulungana kusaka, tondo abe wola ku bantu bansania, ukuvuama kuigisia, nu na nkiki,

²⁵ ane babo bekumuenzia, buno embe Kalaga abagalukie, buno beiyanie aba nu kumenyinina buligo,

²⁶ bubo babe na bumenyinino bua kutuka muitega lia Satana, nubo bakandilue nu kulutua nage nu kuyanga lutundo luage.