II Batesolonike 3 - Nouveau Testament en Kilega

Paolo Ekutunda Bamusegele ku Kalaga.

¹ Umpanga, mibuto zeitu, mutusegele buno idagi lia Mukota libalangane nu liganunue, anga buli kueinyu;

² nu tonibue ku bantu batasuaga nu babi; kubuno bansania tabeli na bukatizio.

³ Tondo Mukota eli mukatizia, amulindie, nu amulange ku wozo mubi.

⁴ Nu tukulemanina Mukota ku bitondo bieinyu, buno mukukita nu muakite butukumukakizia.

⁵ Nu Mukota amulolesie lutundo lua Kalaga mu mitima zeinyu, nu mu komanizia ka Klisto.

Tabagomie na Bantu Babi.

⁶ Tukumukakizia, mibuto zeitu, muizina lia Mukota weitu Yesu Klisto, buno muidekanukie na wozo ukukita butakulungana kumuli, aba utakuyanga meigisia matuamuigisizie.

⁷ Inyue benyene muizi bumunatususania: kubuno tatuamulubikanizie;

⁸ aba tatualile kua muntu unsania buliabulia, tondo tuakitile milimo nu tuakutilue musi nu kindi, tatuakutizie muntu umozi wa kumuli:

⁹ tondo ta kubuno tatuabezaga na buangato, tondo tuatundaga tugu kumulolesia bumu­tususania.

¹⁰ Kubuno aba nkungu zezo zituabezaga kueinyu, tuamukakizizie kitondo kikino buno ndi muntu ntekutunda kukita mulimo, kasi ntalie idia.

¹¹ Kubuno tukungua buno kuli bamozi ba kumuli bekukita butakulungana, tabakukita mulimo, tondo bekulubikania.

¹² Umpanga tukubakakizia babano nu kuba­sengezia mu Mukota weitu Yesu Klisto buno, bakite mulimo ku bubobelelo, nu kulia idia liabo libekukita.

¹³ Tondo inyue, mibuto zeitu, tamukutue mu kukita busoga.

¹⁴ Tondo ndi muntu nte­kukita anga butuatenda mu mukanda wono, nti muakokomeka muntu wozo, aba tamugomia nage, buno embe anakua na nsoni.

¹⁵ Tondo tamumukengele buno eli muiti, tondo mumuane anga mubuto weinyu.

¹⁶ Kano kaluma Mukota wa bubobelelo wenyene amukase bubo­belelo bindi binsania ku nkita insania. Mukota abe neinyue bansania.

¹⁷ Samba kumuli nne Paolo nowasanza, bubuno buli kakenge­lesio mu mikanda zane insania; ububo bunkusanza.

¹⁸ Mponga za Mukota weitu Yesu Klisto zibe neinyue bansania.