II Bakolinto 8 - Nouveau Testament en Kilega

BaEkelezia ba mu Makedonia Bakungikile Biabo Bingi Bia Kukasia Basambi ba mu Yelusalema.

¹ Nu, mibuto zeitu, tukumulolesia musagu wa mponga za Kalaga zakitilue ku maekelezia ma ku Makedonia;

² kubuno balindikilue na malindiko meingi, tondo mbogimbogi zabo ningi nu buzambi buabo buitide mu bugumi bua kutalikila kuabo.

³ Ku­buno nkubalongekela, ku kuvuama kuabo, nu kuitila kuabo, baka­sene biabo ku lutundo luabo bobenyene,

⁴ batusengezizie nunse nu kutukakizia ku misagu za lukaso luluno, buno bagomie nabo baku­kitila basuagibua:

⁵ bakitile bubuno, tanga butualemaninaga, tondo balingile kuikasana bobenyene ku Mukota, nu kutuli mu kusombola kua Kalaga.

⁶ Aba tuasengezizie Tito, amuzindilizizie lukaso luluno anga bulualingile.

⁷ Umpanga anga bumukuitila mu binsania, ku bukatizio, nu ku kutenda, nu ku menge, nu ku lutundo lunene nunse, nu lutundo lueinyu kutuli, buno muitile bubo mu mponga zeno nunse.

⁸ Nsikumukakizia, tondo ku lutundo lunene lua bango bantu nigeleke lutundo lueinyu.

⁹ Kubuno mukumenya mponga za Mukota weitu Yesu Klisto, buno abezaga mugumi, tondo abede muzambi ku kabamba keinyu, buno mugume ku buzambi buage.

¹⁰ Nunne nkumukengelezia kitondo kikino: kubuno kitondo kikino kili kisoga kumuli, kubuno muse muakukia muaka umozi, ta ku kukita tugu, tondo kukutunda.

¹¹ Tondo kano kaluma musililizie kuko kukita; buno anga bubo bumuatundile kukita, bubo ububo mube kayikayika ku kusililizia na bibio bimuli nabio.

¹² Kubuno ndi mutima ukutunda, nti uli anga ukukasana bibio biguli nabio, ta bibio biguteli nabio.

¹³ Kubuno nsikutenda bubuno, buno bango babogeboge nuinyue mube na tubebe;

¹⁴ tondo bunsania bulingimane; mu zeno nkungu kasiazi banenyu na beinyu, nu banenyu bamukasie na biabo; nu binsania bialingi­mane:

¹⁵ anga buasanzilue bune, We wakungikile bingi nteitide, Nuwe wakungikile bikeke ntiyanine.

Mulimo wa Tito na Basingilue Nabo.

¹⁶ Tondo Kalaga asimue, wabikile lutundo mu mutima wa Tito lua kumenya bitondo bieinyu.

¹⁷ Kubuno eitabizizie anga butua­mubulaga; nu abede nunse na nkaso, nu endile kueinyu anga buatundaga.

¹⁸ Nu tuamusingile na mubuto weitu wozo ulu­ganuno luage luakukile mu maekelezia mansania;

¹⁹ nu ta bubo tugu, tondo u wozo wasombuedue na maekelezia ende gamozi neisue mu kitondo kia lukaso luluno lutukukitila ku lutanuno lua Kalaga nu kutananizia mitima zeitu:

²⁰ tuibembukie na kitondo kikino, muntu anavua kutubinga mu musagu wa lukaso luno lutu­kukitila:

²¹ tulingazi kukengela busoga, ta ku Mukota tugu, tondo aba nu ku bantu.

²² Nuisue tuasingile mubuto weitu nabo utuakitaga nabo mulimo bindi bingi nu abezaga na komanizia, nu kano kaluma eli na komanizia nunse, kubuno eli na kilemanizio kinene kumuli.

²³ Umpanga ndi muntu ekutunda kumenya misako za Tito, nti nagomia nage, nu nti ekukitaga mulimo nanne kumuli; aba ndi ku misako za mibuto zeitu, nti beli basingua ba maekelezia, nu beli lutanuno lua Klisto.

²⁴ Umpanga lolesiazi babano ku maekelezia kakengelezio ka lutundo lueinyu, nu bubuno ubutukuika kumuli.