II Bakolinto 6 - Nouveau Testament en Kilega

Paolo Ekuimenesia Buno eli Mukiti Musoga wa Mulimo wa Kalaga mu Tubebe Tuage.

¹ Nuisue tukukitaga mulimo gamozi nage tukusengezia buno tamusekele mponga za Kalaga buliabulia.

² (Kubuno ubuate­ndile bune, Mu nkungu ziwitabizizie nakungule, Nu mu busi bua lonio nakukasizie: Unguilila, kano kaluma nkungu ziwitabizibua; unguilila, kano kaluma buli busi bua lonio):

³ tatube ikitano liakukukia mu binsania buno mulimo weitu tagubingue;

⁴ tondo mu binsania tukuikaka, anga bakiti ba Kalaga, mu nkiki nnene, mu tubebe, mu kuiyanina, mu bitondo bibibu,

⁵ mu kulibulua, mu bikando, mu mulubu, mu mulimo, mu kulanga, mu kukanda;

⁶ mu busoga, mu menge, mu kuikalila, mu mponga, mu Muuza Wasililila, mu lutundo luteli na buengelezi,

⁷ muidagi lia bulili, mu magala ma Kalaga; ku ngabo za kuisanana za kuboko kuidume nu za kuboko kuikazi,

⁸ ku lutanuno nu ku nsoni; ku kutendua bubi nu ku kutendua busoga; anga bengelezi, tondo tuli bantu ba bulili;

⁹ anga batakumenyua, nu bakumenyua; anga bakua, nu kasi tuli na kalamo; anga basu­ngibua, nu bateitua;

¹⁰ anga beli na kabebe, tondo bindi binsania tukubogaboga, anga bazambi, tondo tukugumia beingi; anga beteli na kena, tondo tuli na binsania.

¹¹ Tukumutenda bunsania, inyue baKolinto, tuamulimbulila mitima zeitu.

¹² Tatukumogoga, tondo inyue benyene ubakuiyo­gogia.

¹³ Umpanga buno, mulige bumuakasilue (nkutenda neinyue anga ku bana bane); mulimbule mitima.

Bantu ba Kalaga Tabeingile mu Bitondo bia Batakatizia.

¹⁴ Tamuingile mu bitondo bia batakatizia: kubuno mugomio mukizi uli gasamba kuisanana nu kuteisanana? Aba, mugomio mu­kizi uli gasamba kiengi nu kapilo?

¹⁵ Nu mugomio mukizi uli gasamba Klisto nu Beliala? aba wakatizia eli na mugomio mukizi na utakatizia?

¹⁶ Nu mugomio mukizi uli gasamba numba za kuku­mbamina Kalaga na nkisi? kubuno inyue muli numba za Kalaga uli Mulami; anga buatendile Kalaga bune, Kubuno nkekala mubeli, nu munkatini muabo nkatabanga gabasamba; nunne nkaba Kalaga wabo, nubo bakaba bantu bane.

¹⁷ Ku bubuno tukazi ku beli, Mulekanukibue nabo, bubo ubuatendile Mukota, Nu tamuitubie ku kinsania kili nsese; Nunne namusekele,

¹⁸ Nabe Soeinyue, Nuinyue muabe bana bane bamulume nu bamukazi, Bubo ubuatendile Mukota uli na magala mansania.