II Bakolinto 3 - Nouveau Testament en Kilega

Kitondo kia Yesu Klisto Kiatinga Kitondo kia Mose.

¹ Ndi tukulinga lingo kuikaka tubenyene? aba ndi tukuiyanina, anga bango, mikanda za kumukaka aba zikutuka kumuli?

² Inyue muli mukanda weitu, wasanzilue mu mitima zeitu, wame­nyininua nu kusomua na bantu bansania;

³ mukumoneka buno buli mukanda wa Klisto, muli mulimo weitu, wasanzilue, ta ku mazi ma kusanza, tondo na Muuza wa Kalaga uli Mulami; ta ku mbabu za makozi, tondo ku mbabu za mitima.

⁴ Nu kikino kili kilema­nizio kituli nakio ku Kalaga mu Klisto:

⁵ kubuno tatukengele buno menge meitu makutukaga kutuli isue benyene, tondo makutu­kaga ku Kalaga;

⁶ nuwe atusuagizie buno tube bakiti beidagano ito; ta ku mulembe, tondo wa Muuza: kubuno mulembe ukuita, tondo Muuza ukukasanaga kalamo.

⁷ Tondo ndi lilio lia lukuo, liasanzilue ku makozi, liavule mu lutanuno, nu bana ba Isalele tabavuamine kulola nunse ku Mose kubuno meiso mage mala­ngalaga; nu lulo lutanuno taluizizizie:

⁸ embe ndi lilino lia Muuza, ndi nti talili na lutanuno?

⁹ Kubuno ndi lililo lia lusungio lili na lutanuno, kasi lilino lisanana nti liatinga lutanuno.

¹⁰ Kubuno aba lilio liatanuinue taliabezaga na lutanuno ku bubuno, ku kitondo kia lutanuno luatinga nunse.

¹¹ Kubuno ndi lilio liatikizibue liabezaga na lutanuno, kasi lilino likuikala lili na lutanuno.

¹² Umpanga ku kuba tuli na kilemanizio kia lukita luluno, tukutenda buligo nunse,

¹³ nuisue tatuli anga Mose, wikukide nsulu ku meiso, buno bana ba Isalele bubatanalola nunse kuzinda kua lilio taluizizizie;

¹⁴ tondo bumenyinino buabo buabede bubibu; kubuno aba nu lelo mu kusoma idagano lia wakalazi nsulu zezo zikede, kubuno tabamenyinine buno, zatikizibue mu Klisto.

¹⁵ Tondo aba nu lelo kungua bekusoma mulembe wa Mose, beli anga batakumenya.

¹⁶ Tondo nkungu zibakagalukila Mukota, uzibakamenyinina.

¹⁷ Umpanga Mukota eli Muuza: nu kuko kuli Muuza wa Mukota, ukuko kuli bukandulua.

¹⁸ Tondo isue tatuakukilua na nsulu ku meiso, kubuno tukusania lutanuno lua Mukota, anga bukusania kiyolo; tukugalukibua ku kisusania kiage, kutuka ku lutanuno aba ku lutanuno anga bulukutukaga kua Mukota uli Muuza.