II Bakolinto 13 - Nouveau Testament en Kilega

¹ Lilino u liane lia masatu kuvua kumuli. Ku tunua tua balongeki babili aba basatu kitondo na kitondo kikokomene.

² Nasilile kumuana kalazi, nu nkumuana nunse, anga bunabezagago limbizi lia mabili bubo, kano kaluma ganteligo, nkubasanzila babo bagile wakalazi, nu ku bango bansania buno, kungua navua nsiakue kiombo;

³ kukuba mukulonda kakengelesio ka Klisto ukutenda mundi; we utatamba kumuli, tondo uli na magala mumuli:

⁴ kubuno aba atakilue mu mutambo, tondo ekulamaga ku magala ma Kalaga. Kubuno nuisue tuli na mutambo mueli, tondo tukalamaga gamozi nage ku magala ma Kalaga meli mumuli.

⁵ Idindikazi inyue benyene, ndi muli mu bukatizio; muidolesie mubenyene. Aba tamuizi buno Yesu Klisto eli mumuli? ndi tamuasombua.

⁶ Tondo nkulemanina buno muamenye buno isue tatuasombua.

⁷ Nu kano kaluma tukusega Kalaga tamukite bubo bunsania buli bubi; ta buno tutundue, tondo buno inyue mukite busoga, aba ndi tuli anga basombua.

⁸ Kubuno tatunavuama kubigia bulili, tondo kukita bulili.

⁹ Kubuno kungua tuatamba nti tukubogaboga, nuinyue nti muli na magala: nu tukusega buno, musililile.

¹⁰ Ku bubuno nasanza bitondo bibino nu nsiliko, ninavua kuzuga kungua niliko ku buangato bubo bunakasilue na Mukota buno nilindie, ta kuandabania.

¹¹ Umpanga, mibuto zane, musililile; mubogeboge; mube na makengelo mamozi; muikale mu bubobelelo: nu Kalaga wa lutundo nu bubobelelo abe gamozi neinyue.

¹² Sambizaniazi na mbogimbogi.

¹³ Basuagibua bansania bamusambizia.

¹⁴ Mponga za Mukota Yesu Klisto, nu lutundo lua Kalaga, nu mugomio wa Muuza Wasililila, bikale neinyue bansania.