II Bakolinto 12 - Nouveau Testament en Kilega

¹ Nkuikaka, aba tabuatunganana; tondo nkabasa ku tulolesio nu malimbulo ma Mukota.

² Nizi muntu umozi mu Klisto, gesegatinga miaka ikumi nu inazi (ndi abezaga mu mubili, nsizi; aba ndi atukile mu mubili, nsizi; Kalaga u wizi), muntu wozo azanzuidue mu mpelela aba nu kuigulu lia masatu.

³ Nunne nizi muntu wozo (ndi abezaga mu mubili, aba ndi atukile mu mubili, nsizi; Kalaga u wizi),

⁴ bubuno azanzuidue mu Palatiso, ungule bitondo bitanavuamua kutendua, nu bitanavuama kutenda muntu.

⁵ Kabamba ka wozo neikake: tondo kundi nnenyene nsikake, umpanga ku mutambo wane.

⁶ Kubuno ndi ninatunda kuikaka, tondo nsinaba kikongolo; kubuno ninatenda bulili: tondo nkuisu­ngula, buno muntu ntankengele kutinga buamonine kundi, aba bungule ku kanua kane.

⁷ Nu ku kabamba ka bunene malimbulo mamano, buno nsikotie nunse, nakominue mukele mu mubili, mugenzi wa Satana kundibula, ninavua kuikotia nunse.

⁸ Ku bubuno nasegile Mukota mambizi masatu, buno nigutuke.

⁹ Ambuide bune, Mponga zane zakuka kuguli; kubuno magala mane masililila mu mutambo. Umpanga nikake mu mutambo wane, buno magala ma Klisto mabe mundi.

¹⁰ Ku bubuno nkuboga­boga mu mutambo, mu kuitoa, mu kuiyanina, mu nsungio, mu biziki bibibu, ku kabamba ka Klisto: kubuno kungua natamba, nti nili na magala.

¹¹ Nabede kikongolo: inyue muansindikile; kubuno buantu­nganene niganunue neinyue: kubuno nsidile kena kukeli na basi­ngua babo banene.

¹² Bulili, tulolesio tua musingua tuakitilue munkatini muenyu mu komanizia kansania, ku tulolesio nu magano­gano, nu makitilo ma magala.

¹³ Kubuno kikizi kimuidile kutinga mango maekelezia ma Kalaga, umpanga nne nsiamukutizie? Munsigilile kitondo kikino kibi.

¹⁴ Unguililazi, lilino limbizi lia masatu nili kayikayika kuvua kumuli; aba nsiamukutizie: kubuno nsikulonda bikulo bienyu, tondo inyue: kubuno tabuatunganana bana kubikila bababuta, tondo bababuta kubikila bana.

¹⁵ Nu nkubogaboga nunse kukasa nu kuikasana ku kabamba ka kalamo keinyu; ndi nkumutunda nunse, nti nakokoke kutundua?

¹⁶ Tondo bube bubo, nne nsiamukutizie; tondo, kukuba nili na menge, namukatile na buenge.

¹⁷ Ndi namonine ku mutali weinyu ku muntu umozi wa babo banasingile kumuli?

¹⁸ Nasengezizie Tito kuenda kumuli, nu namusingile na mubuto weitu. Ndi Tito amonine ku mutali kumuli? Ndi tatuendile mu muuza umozi? Nu masomoneno mamozi?

Paolo Ekubakengelezia.

¹⁹ Mukukengela buno, tukuisuagia kumuli. Ku Kalaga tukute­nda bitondo bibino binsania mu Klisto; nu, batundua bane, bili ku kabamba kakumulindia.

²⁰ Kubuno nkukua boba, mu kuvua kuane, ninavua kumusanga, tanga bubo bunkutunda kumusanga; nunne namoneke anga bubo bumutakutunda; ninavua kusanga embe miango, nu lugi, nu bongoa, nu nsake, nu kukandika, nu manungunungu, nu luikotio, nu kazege;

²¹ nunne ganavue lingo Kalaga wane anavua kumbotia munkatini mueinyu, nu nkalilila beingi babezaga bagi ba wakalazi, nu tabeiyanizie ku nsese, nu butazi, nu ntundo mbi zibakitile.