Balomo 9 - Nouveau Testament en Kilega

Mutima wa Paolo Uli na Kabebe ku baIsalele.

¹ Nkutenda buli bulili mu Klisto, nsikueka buza, kalenganio kane kakundongekela mu Muuza Wasililila,

² buno nili na kabebe kanene nu lubaba lutakusila mu mutima wane.

³ Kubuno ninatunda nnenyene nisuililue nu kulekanukibua na Klisto ku kabamba ka mibuto zane, kikanga kiane ku mubili:

⁴ beli balsalele; bakubikua lingo bana, nu lutanuno, nu malagi, nu kukasua mulembe, nu ikumbamino, nu malagano mage;

⁵ nu beli na beisingulubo mubeli umuatukile Klisto ku lukita lua mubili; uli muangati wa binsania, Kalaga aganunue ku nkiko zitanakuzinda. Amena.

Kalaga Ekusombola Bantu Bage

⁶ Tabuno idagi lia Kalaga liengukana. Kubuno ta bansania beli balsalele ubaganzilue ba balsalele;

⁷ aba tabansania ubeli kikanga kia Abalahama; tondo, mu Isaka kikanga kiobe kikamanua.

⁸ Kubuno ta bana ba mibili ubeli bana ba Kalaga, tondo bana ba lilio idagano ubeli bana ba Kalaga.

⁹ Kubuno lilino u iyuki lieidagano: ku nkungu zeno navue nu Sela abute muana wa­mulume.

¹⁰ Aba ta bubo tugu; tondo Lebeka eikezibue iyimi na tateisue Isaka,

¹¹ kubuno gabezaga babo bana tabebutua, aba tabekita busoga aba bubi, buno makengelo ma Kalaga ma kusombola memane, ta ku makitilo, tondo ku wozo ukumanaga,

¹² abuidue bubuno bune, Mukulu munene akakitila muana muto.

¹³ Anga buasanzilue bune, natundile Yakobo, tondo Esau namuso­mbile.

¹⁴ Umpanga tutende buni? Ndi kuli buteisa ku Kalaga? Kilo aba nunse.

¹⁵ Kubuno abuide Mose bune, Nkamukuila kiombo wozo unkakuila kiombo, nu nkamukasa mponga wozo unkakita mponga.

¹⁶ Ndi anga bubo kasi ta ku magala ma wozo ukutunda, aba ta ma wozo ukusasia, tondo ma wozo ukukua kiombo u Kalaga.

¹⁷ Kubuno masanzo matendile ku Falao bune, Ku bubuno nakusakikile, buno nilolesie magala mane muguli, nu izina liane lisambalue mu kisi kinsania.

¹⁸ Ububo wozo wakutunda kukuila kiombo nti amukuila kiombo, nu wozo wakutunda kukita mutima mubibu nti amukita mutima mubibu.

¹⁹ Umpanga wambule buno, kubuni ekiazuga? Kubuno nazi unasunua na kusombola kuage?

²⁰ Ta bubo, E muntu, tondo uwe nazi ukuakula Kalaga? Kibumbua kiabumbilue ndi kinate­nda ku wozo wakibumbile buno, kubuni kuwambumbile bubuno?

²¹ Abandi mubumbi nteli na buangato kuibumba ku kibombo kimozi kubumba kibumbua kimozi kikuanzua, nu kimozi takikuanzua?

²² Umpanga Kalaga, atundile kulolesia bongua buage, nu kulolesia magala mage, alindide na nkiki nnene ku bibio bia bongua biakulu­mizibue ku lukuo:

²³ nu lingo alolesie buingi bua lutanuno luage mu bibio bia kiombo, biakulumizizie kutukila wakalazi buno bibe na lutanuno,

²⁴ ubeisue bamanine, ta baYuda kanka­nka, tondo nu baBilongo nubo?

²⁵ Ububo buatendile mu Osea bune, Nkabamana bantu bane, batabezaga bantu bane; Nu we mutundua wane utabezaga mutundua wane.

²⁶ Nu bukaba, ku kiziki kikio kibabuidue, Inyue tamuli bantu bane, Ugago bakamanua bana ba Kalaga uli Mulami.

²⁷ Nu Yesaya alalukile neiyuki ku ba Isalele bune, Kilo maganzo ma bana ba Isalele manabede anga misege za kitatenge, tondo babo nkindi tugu ubakonibua:

²⁸ kubuno Mukota akasililizia mulimo wage ku kisi, akagusila, nu akaguzindilizia.

²⁹ Nu, anga buali­ngile kutenda Yesaya, Songo Mukota weiyombo ntatusigide kikanga, Songo tunabede anga Sodoma, nu tunalingimanizibue na Gomola,

BaIsalele Basombile Musagu wa Kalaga, baBilongo Bagutundile.

³⁰ Umpanga tutende buni? Buno baBilongo, batayangile kuisanana, bamonine ku kuisanana, ukuisanana kua bukatizio;

³¹ tondo balsalele, bayangile mulembe wa kuisanana, tababasile ku wozo mulembe wa kuisanana.

³² Ku kabamba kakizi? Ku­buno tabagulondile mu bukatizio, tondo ku makitilo. Kubuno beikukile kuikozi lilio likukikitanagia.

³³ Anga buasanzilue bune, Mungue, nabika mu Siona ikozi likukikitanagia, nu luanda lukugusagia: Nu unsania ukamukatizia ntakakua na nsoni.