Balomo 5 - Nouveau Testament en Kilega

Misako za Kubingibua ku Bukatizio.

¹ Umpanga ndi tuasila kubingibua ku bukatizio, tuli na bubo­belelo na Kalaga, mu Mukota weitu Yesu Klisto;

² kubuno mueli tuakasilue bukatizio kubasa ku mponga zeno zituimine muzo; nu kubogaboga mu kilemanizio kia lutanuno lua Kalaga.

³ Aba ta bubo tugu, tondo tubogeboge mu nsungio insania; nu ku kumenya buno nsungio zikulusia nkiki;

⁴ nu nkiki zikulusia kukokomena nu kukokomena kukulusia kilemanizio:

⁵ nukio kilemanizio kiteli na nsoni; kubuno lutundo lua Kalaga luabalanganizibue mu miti­ma zeitu na Muzau Wasililila utuakasilue.

⁶ Kubuno gatuabe­zaga tatuli na magala, nu gakukile nkungu Klisto akuilide babi.

⁷ Kubuno buli bubibu muntu kukuila muntu wisanana; tondo buna­kulungana muntu kulindika kukuila wozo uli musoga.

⁸ Tondo Kalaga ekulolesia lutundo luage kutuli, kubuno Klisto atukuilide gatuabezaga tukili bagi.

⁹ Umpanga kuitila nunse kano kaluma ndi tuasila kubingibua mu mikila zage, tukonibua ku bongua mueli.

¹⁰ Kubuno, ndi gatuabezaga beiti, tuakulumanizibue na Kalaga ku lukuo lua Muana wage, kuitila nunse, gatuakulumanizibue, tukoni­bua mu kalamo kage;

¹¹ aba ta bubo tugu, tondo tukubogaboga mu Kalaga ku Mukota weitu Yesu Klisto, kubuno mueli tuakulu­manizibue.

Lukuo mu Adama, Kalamo mu Yesu Klisto.

¹² Ku bubuno, anga bubo ku muntu umozi buagi buabeide mu kisi, nu lukuo ku kabamba ka buagi; bubo lukuo luabaside bantu bansania, kubuno bansania bagile;

¹³ kubuno buagi buabezaga mu kisi nti mulembe taguba: tondo buagi tabunatekuidue songo mule­mbe tagubezageko.

¹⁴ Tondo lukuo luangatile kutukila ku Adama aba nu ku Mose, nu luangatile babo batakitile buagi bua lukita lua kukagula kua Adama, uli kisusania kia wozo ukavua.

¹⁵ Tondo lukaso lulo lua mponga taluabezaga anga bubo buagi, kubuno ndi ku buagi bua wozo umozi beingi bakule; kuitila nunse mponga za Kala­ga nu lukuo luli mu mponga za muntu umozi Yesu Klisto bietide ku kabamba ka babo beingi.

¹⁶ Nu lukita lua wozo muntu umozi wa­gile, talugezie na lulo lukaso; kubuno lusungio luavule ku muntu umozi lualusizie lubabazio; tondo lukaso lua mponga luavule ku ka­bamba ka buagi buingi lualusizie kubingibua.

¹⁷ Kubuno, ndi ku buagi bua muntu umozi, lukuo luangatile ku kabamba ka wozo umozi; kuitila nunse, babo bekukitilagua mponga ningi nu lulo lukaso lua kuisanana bakangata mu kalamo ku wozo umozi Yesu Klisto.

¹⁸ Umpanga lingo anga bubo ku buagi bumozi bantu bansania basungizibue, bubo kuikitilo limozi lisanana bantu bansania babi­ngizibue mu kalamo.

¹⁹ Kubuno anga ku kunana kua muntu umozi bansania babeide bagi, bubo ku kuanza kua muntu umozi babo beingi babikilue beisanana.

²⁰ Tondo mulembe wabeide buno buagi bubo buitile: tondo buagi gabuitide, mponga zeitide ningi nunse;

²¹ buno, anga bubo buagi buangatile mu lukuo, bubo ku kuisanana mponga zangate aba ku kalamo katanakuzinda mu Yesu Klisto Mukota weitu.