Balomo 3 - Nouveau Testament en Kilega

Bitondo bia ba Y uda Bikubagia.

¹ Umpanga kikizi bunene bua muYuda? nu kumonesibua kuli na mutali mukizi?

² Buatananina nunse mu bunsania: kulinga bakasilue bulangi bua bitondo bia Kalaga.

³ Nu ndi bamozi tabakatizizie? ndi kutakatizia kuabo kunagalukia bukatizio bua Kalaga?

⁴ Kilo aba nunse, tondo Kalaga amoneke buno eli bulili, nu muntu na muntu muza; anga buasanzilue bune, Buno ubinge mu bukutenda, Nu ukinde gokusungibua.

⁵ Tondo ndi bubi bueitu bukulolesia kuisanana kua Kalaga, nti tutende buni? Ndi Kalaga eli mubi ganatusungia? (Natenda ku lukita lua bantu.)

⁶ Kilo aba nunse: buni bunavuama Kalaga kusungia kisi?

⁷ Tondo ndi buza buane bukuganuna bulili bua Kalaga, kubuni nunne nenyene nikili nasungibua anga muagi?

⁸ nu kubuni tatukukita bubi, buno busoga buvue? (anga butuakandisizibue nu bango bantu bakuidindika buno tukutenda bubo.) Lusungio luabo luli luisanana.

⁹ Kikizi lingo? Ndi tuli basoga kutinga bango? Kilo, aba nunse: kubuno tuasilile kusongela baYuda nu baGeleka, buno bansania beli mu buagi.

¹⁰ Anga buasanzilue bune, Takuli wisanana, aba umozi;

¹¹ Takuli ukumenyinina, Takuli ukulonda Kalaga;

¹² Bansania bazimine, babigile bansania; Takuli muntu ukukitaga busoga, aba umozi;

¹³ Miego zabo zili nsinda zili buasi; Ndami zabo zili na buengelezi: Lulalo lua nzoka luli kunsi kua milomo zabo:

¹⁴ Tunua tuabo tuizile na bisuililo nu lubaba:

¹⁵ Magulu mabo makusasia kukubula mikila;

¹⁶ Kubiga nu tubebe bili mu nzila zabo;

¹⁷ Nu nzila za bubobelelo tabazimenyine:

¹⁸ Tabekukua Kalaga boba.

¹⁹ Tuizi buno, binsania bikutendua na mulembe, bikutendua ku babo beli mu mulembe; buno kanua na kanua kalimbue, nu kisi kinsania kibe mu lusungio lua Kalaga:

²⁰ kubuno takuli muntu ukubingibua ku makitilo ma mulembe kueli, kubuno ku mulembe misako za buagi zikumenyua.

Tondo Tugu Bukatizio Buhutubingia.

²¹ Tondo kano kaluma kuisanana kua Kalaga kuamenyininua kuteli mulembe, kualongekilue na mulembe nu balengania;

²² u kuisanana kua Kalaga kuli mu bukatizio mu Yesu Klisto ku bansania bakatizia; kubuno takuli kukutia;

²³ kubuno bansania bagile, nu bekuidaga lutanuno lua Kalaga;

²⁴ bekubingibua bulia ku mponga zage ku bukuluzi buli mu Klisto Yesu:

²⁵ kubuno Kalaga asilile kumubika abe mukulumania, ku bukatizio, mu mikila zage. Buno alolesia kuisanana kuage, ku kabamba ka kusigilila mu kuikalila kua Kalaga buagi bunsania buakitagua wakalazi;

²⁶ kulolesia kuisanana kuage mu nkungu zeno; buno abe wisanana, nu mubingia wa wozo ukukatizia Yesu.

²⁷ Kuikaka kuli kuni lingo? Kuatukizibue. Ku mulembe mukizi? ku mulembe wa misako? Kilo: tondo ku mulembe wa bukatizio.

²⁸ Tuizi buno muntu ekubingibua ku bukatizio kuteli ku misako za mulembe.

²⁹ Ndi Kalaga eli wa baYuda tugu? Ndi nteli Kalaga wa baBilongo nubo? E, wa baBilongo nubo:

³⁰ ndi lebelebe Kalaga eli umozi, ukabingia babo bamonesizibue mu bukatizio, nu babo batamonesibua akababingia mu bukatizio.

³¹ Umpanga ndi tukubigia mulembe ku bukatizio? Kilo, aba nunse. Tondo tukulindia mulembe.