Balomo 16 - Nouveau Testament en Kilega

Paolo Ekusambizia Ekelezia.

¹ Namusingila Foibe mubuto weitu, uli mukiti wa ekelezia lia Klisto lili mu Kenekelea:

² buno mumusekele mu Mukota, anga buatananina basuagibua, nu nti muamukasia mu bunsania bua kuiyanina kumuli: kubuno we asabezaga mukasia wa bantu beingi, nu ekunkasagia nunse.

³ Nti muankatila samba ku Pilisikila nu Akuila, bakukitaga mulimo nanne mu Klisto Yesu,

⁴ babezaga bankuila; nkubaga­nuna, aba ta nnenyene tugu, tondo nu maekelezia ma Klisto ma baBilongo bansania:

⁵ nu nti muankatila samba ku ekelezia lia Klisto lili mu numba zabo. Nti muankatila samba ku Epaineto mutundua wane, kubuno wozo uwalingile kukatizia Klisto mu Asia.

⁶ Nti muankatila samba ku Malia, wamukitide mulimo nunse.

⁷ Samba ku Andolonika nu Yunia, mibuto zane, nu bango banakandagua nabo, bakuanzagua na basingua, nubo balingaga kuba mu Klisto kundi.

⁸ Samba ku Ampuliato, mutundua wane mu Mukota.

⁹ Samba ku Ubano, ukukita mulimo umozi neisue mu Klisto, nu Sataku, mutundua wane.

¹⁰ Samba ku Apela, weitabizibua mu Klisto. Sekelazi bantu ba numba za Alistabulo.

¹¹ Samba ku Elodiona, mubuto wane. Sekelazi ba numba za Nalukisu beli mu Mukota.

¹² Samba ku Tulupaina nu Tuluposu, bakiti ba mulimo mu Mukota. Sekelazi Pelusi mutundua wane, wakitile milimo mingi mu Mukota.

¹³ Samba ku Lufu, muso­mbolua mu Mukota, nu nina, uli mmane nunne.

¹⁴ Samba ku Asunkulito, nu Filegone, nu Elemo, nu Patoloba, nu Elemi, nu mibuto zibeli nabo.

¹⁵ Samba ku Filogogo nu Yulia, Neleu nu mubitu wage, nu Alumpa, nu basuagibua bansania ba beli nabo.

¹⁶ Sambizaniazi na mbogimbogi. Ma ekelezia mansania ma Klisto mamusambizia.

Paolo Ekubakengelezia nu Kubalaga.

¹⁷ Kano kaluma nkumusengezia, mibuto zane, idangazi na babo bakumulekanukia nu kukita misona, nu misako zakumuanzukania na meigisia mamuigisizibue: muibembukie nabo.

¹⁸ Kubuno babo beli bubuno tabakukitilaga Mukota weitu Yesu Klisto, tondo ntundo zabo bebenyene; nu ku kutenda kusoga nu ku kusambala kusoga bekuengelelaga mitima za bantu betegisibua.

¹⁹ Kubuno luanzo lueinyu lungubuako na bantu bansania. Umpanga nabogaboga neinyue, tondo nkutunda mube na menge mu misako misoga, nu bikongolo mu misako mibi.

²⁰ Nu Kalaga wa bubobelelo anyante Satana ku magulu meinyu yiliyili. Mponga za Mukota weitu Yesu Klisto zibe neinyu.

²¹ Timoteo, unkukitaga nage mulimo; amusambizia: nu Lukio nu Yasono nu Sosipateo, mibuto zane.

²² Nne Telutio, uwasanza mukanda wono, namusambizia mu Mukota.

²³ Gayo mukungi wane, nu wa ekelezia linsania lia Klisto, amusambizia. Elasito mulangi wa bikulo mu muino amusambizia, nu Kualutu, mubuto weitu.

²⁴ Mponga za Mukota weitu Yesu Klisto zibe neinyue bansania. Amena.

Paolo Ekuganuna Kalaga.

²⁵ Kano kaluma ku wozo uli na magala ma kumulindia ku musagu musoga wane nu kusambala kua Yesu Klisto, ku kubisula kakungu kabisilue kutukila wakalazi,

²⁶ tondo kano kaluma kalolesibua mu nkungu zeno, ku masanzo ma balengania, ku kuka­kizia kua Kalaga utanakuzinda, kamenesezibue ku baBilongo bansania buno banze bukatizio:

²⁷ ku Kalaga uli na menge wenyene, lutanuno lube mu Yesu Klisto aba ku nkiko zitanakuzinda. Amena.