Balomo 15 - Nouveau Testament en Kilega

Tukasanie mu Musagu wa Kalaga.

¹ Buatunganana isue beli na magala kulindia babo beteli na magala, aba tatuitananizie isue benyene.

² Na muntu na muntu kutuli atananizie munyage ku busoga, ku kumulindia.

³ Kubuno Klisto nteitananizizie wenyene, tondo anga buasanzilue bune Kuzuga kuabo babo bakuzigide kuankiminine.

⁴ Kubuno binsania biasanzilue wakalazi biasanzilue buno bituigisie, buno nkiki nu ku kubobelezia kua masanzo tube na kilemanizio.

⁵ Nu Kalaga wa nkiki nu mubobelezia amukase makengelo mamozi inyue bansania ku lukita lua Klisto Yesu:

⁶ buno ku mutima umozi nu ku kanua kamozi muganune Kalaga Isi wa Mukota weitu Yesu Klisto.

⁷ Ku bubuno musekelane bueinyu bueinyu, anga buatuse­kede Klisto, buno Kalaga aganunue.

⁸ Umpanga natenda buno Klisto abeide mukiti weidagano lia kumonesibua ku kabamba ka bulili bua Kalaga, buno alindie malagano makasilue ku batateisue,

⁹ nu buno baBilongo baganune Kalaga ku kabamba ka kiombo kiage, anga buasanzilue bune, Ku kabamba kakano nkakuganuna ku baBilongo, Nkeimbila izina liobe.

¹⁰ Nu lingo atenda, Bogazibogazi inyue baBilongo, gamozi na bantu bage.

¹¹ Nu lingo, Ganunazi Mukota, inyue baBilongo bansania: Nu muganunazi bantu bansania.

¹² Nu lingo Yesaya atenda bune, Mu kikanga kia Yese, Umukabutua ukangata baBilongo; Uwozo ukalemaninua na baBilongo.

¹³ Umpanga Kalaga wa kilemanizio amuiyazie na mbogimbogi insania nu bubobelelo mu kukatizia, buno muitile kuba na kilema­nizio, mu magala ma Muuza Wasililila.

Paolo Ekubasambalila bua Mulimo Wage nu Lugendo Luage Kubeli.

¹⁴ Nunne nenyene, mibuto zane, nkumenya ku musagu weinyu, buno nuinyue muizile na busoga, muiyazibua na menge mansania, nu mukuvuama kuanana.

¹⁵ Tondo, mibuto zane, namusanzide na ngini kumukengelezia ku mponga zezo zinakitilue na Kalaga,

¹⁶ buno nibe mukiti wa Yesu Klisto ku baBilongo, nikite mulimo wa musagu musoga wa Kalaga, buno lukaso lua baBilongo luita­bizibue, ku kusuagibua na Muuza Wasililila.

¹⁷ Umpanga nkui­kaka mu Yesu Klisto ku mulimo wane ku Kalaga,

¹⁸ Kubuno nsinageleka kutekula kitondo kitakitile Klisto mu mulimo wane, buno baBilongo banze ku kutenda aba kuikitilo,

¹⁹ mu magala ma migeleko nu mangamo, mu magala ma Muuza Wasililila; aba buabezaga kulinga mu Yelusalema, nu mu ntungo muage aba mu Iluliko,

²⁰ nagelekile kusambala musagu musoga, ku kiziki kitesa­mbalua izina lia Yesu, navua kubaka ga kibanza kia ungo muntu;

²¹ tondo, anga buasanzilue bune, Babo batasambalidue misagu zage bakumona, Nu babo batongule bakamenyinina.

²² Ku bubuno nabigenue mambizi meingi buno nsivue kumuli:

²³ tondo kano kaluma, kubuno nsili lingo na nkungu mu ndenge zeno, ku miaka mingi nili na lutundo lunene lua kuvua kumuli,

²⁴ nkungu zinkenda ku Sipania nti nketa kumuli (kubuno nili na kilemanizio kia kumumonako mu lugendo luane, nu muanelekezie kuko, nu nsizizie kueinyu)—

²⁵ tondo kano kaluma, nkuenda ku Yelusalema, kukitila basuagibua.

²⁶ N u buno buatananizia bantu ba Makedonia nu Akaya kukita mitebe ku kabamba ka basuagibua ba ku Yelusalema beli bazambi.

²⁷ Lebelebe, buabatananizia; nu beli na nsombi kubeli. Kubuno ndi baBilongo bakasilue bumenyinino bua muuza anga isue, kasi nti buabatunganana kuba­kitila ku bia mubili.

²⁸ Umpanga ganasila mulimo wono kubabikila mitebe zeno, nu nabikile kamenyikilo ka biguma bibino kubeli, nti nete zeno nzila kumuli ganende ku Sipania.

²⁹ Nunne nizi buno, ganavue kumuli, nti navue mu mbogimbogi ningi za Klisto.

³⁰ Kano kaluma nkumusengezia mibuto zane, mu Mukota weitu Yesu Klisto, nu lutundo lua Muuza, idindikazi mu masego nunse gamozi nanne ku Kalaga:

³¹ buno nnavua kuitua na babo batakatizia mu Yudaya, nu mulimo wane undi nago kuko ku Yelusalema witabizibue na basuagibua:

³² buno nivue kumuli na mbogimbogi anga bukutunda Kalaga, nu kumunua neinyu.

³³ Nu Kalaga wa bubobelelo abe neinyue bansania. Amena.