Balomo 12 - Nouveau Testament en Kilega

Bantu Babike Bubekukita ku Kalaga.

¹ Umpanga, nkumusengezia, mibuto zane, ku kiombo kia Kalaga, buno mukasane mibili zeinyu zibe kisansa kikula­maga, kiasuagibua, nu kikutananizia Kalaga, ikumbamino lienyu lia bumenyinino.

² Tamususananie na bantu ba nkiko zeno: tondo mugalukibue ku bumenyinino bueinyu buto, buno mumenye nunse buni buli kusombola kua Kalaga kuli kusoga, nu kuakumutananizia nu kuasililila.

³ Kubuno kumpongazinakitilue nkubula muntu namuntu kumuli, nteikengele wenyene kutinga buatunganana kukengela; tondo abe na makengelo mabota anga buamubeganizizie Kalaga bukatizio ku muntu na muntu.

⁴ Kubuno anga bubo mu mubili umozi tuli na biganza bingi nubio biganza binsania tabikukita mulimo umozi;

⁵ bubo nuisue, tuli beingi, tuli mubili umozi mu Klisto, nuisue bansania tuli biganza, na kiganza na kiganza ku kingo.

⁶ Umpanga, kubuno tuli na nkaso zengukana, anga mponga zituakitilue, ndi bulengania nti tualengania ku bukatizio bueitu;

⁷ ndi ku mulimo wa kukasia, nti tube mu mulimo weitu wakukasia; wozo ukuigisia, abe mu kuigisia kuage;

⁸ wozo ukuana nti ana: mukasania, akasane na mutima utenanduma; muangati, angate na komanizia; ukukua kiombo, akikue na mbogimbogi.

⁹ Lutundo talube na buengelezi. Sombazi bubi; Gomiazi na busoga.

¹⁰ Ku lutundo lua mibuto zeinyu, kitanazi mponga bueinyu bueinyu, ku luanzo mutundane kutinga bumuitunda mubenyene;

¹¹ mube na komanizia, tamube na kogia mu kukita: mube na lutundo lunene mu mitima zeinyu, mukitile Mukota;

¹² mubogeboge mu kilemanizio, mube na nkiki mu mbabazio, muikokomezie mu kusega;

¹³ mukasie basuagibua ku kuiyanina kuabo; musekele bageni.

¹⁴ Kitazi babo bakumubabazia mponga: kitazi mponga, nu tamusuilile.

¹⁵ Bogazibogazi na babo bekubo­gaboga; lilazi na babo bekulila.

¹⁶ Mube na bumenyinino bumozi bueinyu bueinyu. Tamukengele buamutinga, tondo kengelazi bumunakosia. Tamube bantu ba kuikotezia menge.

¹⁷ Wamukita bubi, tamumukite bubi. Kitazi misako misoga ku bantu bansania.

¹⁸ Ndi buakulungana kumuli, mube na bubo­belelo na bantu bansania.

¹⁹ Batundua bane, tamuisube mu­benyene, tondo musigile Kalaga bongua, kubuno buasanzilue bune, Kusuba kuli kundi; nokasuba, u buatendile Mukota.

²⁰ Tondo ndi wakusomba ekukua na nzala, nti wamulisia; ndi ekukua na mpusia, nti wamunusia; kubuno ndi wakita bubo nti wamubike kibombo kia makangania ma keiya gantata geitoe.

²¹ Ntukindue na bubi, tondo ukinde bubi na busoga.