Balomo 11 - Nouveau Testament en Kilega

Kalaga Ntatikizie baIsalele ku Nkiko Zitanakuzinda.

¹ Umpanga nabuzia bune, Ndi Kalaga asindikile bantu bage bulazi? Kilo, aba nunse. Kubuno nunne nili mulsalele umozi, wa kikanga kia Abalahama, wa kilongo kia Benzamini.

² Kalaga ntasindikile bantu bage bulazi bamenyinine mu kulinga. Ndi tamukumenya bukutenda masanzo ku bua Eliya? Lukita luasongede balsalele ku Kalaga, atendile bune,

³ Mukota, beitile balengania bobe, nu babalanganizie tuyulo tuobe; nunne nasigala nnenyene, nubo bakulonda kunita.

⁴ Tondo Kalaga amuakuide buni? Neibikide bamulume tununu mutuba kamo, batekumba­mina Bala.

⁵ Nu bubo ku nkungu za kano kaluma, kuasigala kindi kia basombolua mu mponga.

⁶ Tondo ndi ku mponga, kasi ta ku makitilo lingo; songo mponga tazili lingo mponga.

⁷ Umpa­nga buni lingo? Bubo bualondaga balsalele, tababumonine: tondo babo basombuedue ubamonine kubo, nu bango babede na mitima za kogia:

⁸ anga buasanzilue bune, Kalaga abakasile mutima utakumenyinina, nu meiso matakumona, nu matuzi matakungua aha nu lelo.

⁹ Nu Davidi atendile bune, Meza mabo mabe anga bukila, nu itega, Nu kia kubakikitania nu idigo kubeli:

¹⁰ Meiso mabo mazibue bubatanamona, Nu ubakumbe migongo zabo bindi binsania.

¹¹ Umpanga nabuzia, ndi beikukile buno bague? Kilo, aba nunse: tondo kugua kuabo lonio luabaside baBilongo, buno ba­kubue lugi.

¹² Umpanga ndi kugua kuabo kuabezaga bugumi bua kisi, nu kukokoka kuabo bugumi bua baBilongo; kikizi kikaba mu kusila kusombolua kuabo?

Paolo Ekuitikia ku Bikanga bia Bantu.

¹³ Tondo nkutenda neinyue baBilongo, kubuno nili musingua wa baBilongo, naganuna mulimo wane;

¹⁴ buno embe nabika lugi ku babo beli mibuto zane, nonie bamozi kubeli.

¹⁵ Kubuno ndi kusindikua kuabo kualusia ikulumanino ku kisi, kuitabizibua kuabo nti kuabe buni, nti kalamo katuka ku bakuzi?

¹⁶ N di kiguma kitangi kiasuagibua, kinsania nti kiasuagibua; nu ndi isina liasuagi­bua, nu ntabi nti zasuagibua.

¹⁷ Tondo ndi ingo ntabi zasesua, nu uwe, uli wa muti wa Oleve wa kalula, wingizizibue munkatini muazo, nu wagomia nazo masina ma muti nu mu nago wa muti wa Oleve;

¹⁸ ntuikake ku ntabi: tondo ndi wikaka, towenyene ukuekaga masina, tondo masina umakukuekaga.

¹⁹ Umpanga ndi unatenda bune, Ntabi zasesilue, buno ningizibue.

²⁰ Lebelebe; zasesilue kukutakatizia kuazo, nu uwe wimana ku bukatizio buobe. Ntuikotie, tondo kua boba:

²¹ kubuno ndi Kalaga ntasigile ntabi ntangi, kasi ntanakusiga nu uwe.

²² Kengelazi busoga nu bukali bua Kalaga: ku babo bakolokile, bukali; tondo kuguli, busoga bua Kalaga, ndi wikala mu busoga buage: nu ndi ntuli bubo nu uwe nti ukasesua.

²³ Nu babo, ndi tabeikala mu kutakatizia, nti beingizibua: kubuno Kalaga anavuama kubeingizia lingo.

²⁴ Ndi uwe wasesilue ku muti wa oleve wa lukita lua mu kalula, nu wingizizibue ku lungo lukita mu muti musoga wa oleve; embe zizo ntabi ntangi zikuingizibua mu muti wazo wa oleve?

BaIsalele Bakonibua.

²⁵ Kubuno nsikutunda mibuto zane, muiba kakungu kakano, buno munavua kuikotia mu menge meinyu mubenyene, buno ba Isalele babede biuku mu mitima aba mu nkungu za kusililila kua kusombolua kua baBilongo;

²⁶ nu bubo ba Isalele bansania bakonibua; anga buasanzilue bune, Mukuluzi akatuka ku Siona; Akagalukia Yakobo ku kunana kuage;

²⁷ Nu lino u idagano liane nabo, Gankabatikia misako za buagi buabo.

²⁸ Umpanga ku musagu musoga, babede beiti ku kabamba keinyu: tondo ku musagu wa kusombolua, beseli batundua ku kabamba ka beisibo.

²⁹ Ku bubuno nkaso nu kumana kua Kalaga tabili na kuibezia.

³⁰ Kubuno anga inyue wakalazi muabengile Kalaga, tondo kano kaluma muakuilua kiombo ku kubenga kuabo,

³¹ bubo nubo bese babenga kano kaluma, buno ku kukuila kiombo kueinyu nubo bakuilue kiombo.

³² Kubuno Kalaga akandile bansania mu kunana, buno akue bansania kiombo.

³³ Naganagana na bunene bua bugumi nu bumenyinino bua Kalaga! nsungio zage tazikumenyininua, nu nkita zage taziku­menyininua!

³⁴ Kubuno nazi wamenyinine makengelo ma Mu­kota? aba nazi ukumukalilaga luango?

³⁵ aba nazi walingile kumukasa kena, buno anasubizibuako lingo?

³⁶ Kubuno binsania bikutukaga kueli, nu bikile ku magala mage, nu bili ku kabamba kage; Lutanuno lube kueli nkiko zitanakuzinda. Amena.