Balomo 10 - Nouveau Testament en Kilega

BaIsalele Basombile Busoga bua Bukatizio.

¹ Mibuto zane, lutundo luane lunene mu mutima nu masego mane ku Kalaga ku kabamba kabo meli buno, bonibue.

² Kubuno nkubalongekela buno beli neiyilili ku kukitila Kalaga, tondo ta ku bumenyinino.

³ Kubuno ku kutamenya kuisanana kua Kalaga nu kutunda kukokomezia kuisanana kuabo benyene, tabeibotezie ku kuisanana kua Kalaga.

⁴ Kubuno Klisto u kuzinda kua mulembe buno na wamukatizia nti atekulua buno eisanana.

⁵ Kubuno Mose asanzile ku kuisanana kukutuka ku mulembe buno, muntu ukukita bubo nti alama kubo.

⁶ Tondo kuisanana kukumoneka ku bukatizio kukutenda buno, ntutende mu mutima wobe buno nazi ukabakama kuigulu? (nti ukugezia Klisto gansi),

⁷ aba, nazi ukagela mu muzinga? (nti ukusakika Klisto kuigulu kutuka ku bakuzi).

⁸ Tondo ku kutenda buni? Idagi lili buigi nobe, mu kanua kobe, nu mu mutima wobe; ulilio lia bukatizio litukusambalaga,

⁹ kubuno ndi witabizia Yesu na kanua kobe buno eli Mukota, nu kukatizia mu mutima wobe buno Kalaga amuyukizie ku bakuzi, nti ukonibua.

¹⁰ Kubuno ku mutima muntu eku­katizia aba nu kuisanana, nu ku kanua ekuitabizia nu konibua.

¹¹ Kubuno masanzo mekutenda buno, unsania wamukatizia ntakeitibua na nsoni.

¹² Kubuno takuli kuengukana gasamba baYuda nu baGeleka kubuno wozo u Mukota wa bansania eli mugumi ku bansania bakumusega.

¹³ Kubuno na muntu na muntu ukasegaga Mukota kuizina liage nti akonibua.

¹⁴ Umpanga buni bubakamana wozo ubatakatizia? Lingo, buni bubakakatizia wozo ubatonguleko? Lingo, buni bubakongua ndi tabeli na musambazi?

¹⁵ Nu lingo buni bubakasambala, ndi tabasingua? Anga buasanzilue bune, Magulu mabo meli masoga, babo bekusa­mbalaga misagu misoga!

¹⁶ Tondo tabansania ubanzile wozo musagu musoga. Kubuno Yesaya atendile bune, Mukota, nazi wakatizizie musagu weitu?

¹⁷ Umpanga bukatizio bukuvua ku kungua, nu kungua kukuvua kuidagi lia Klisto.

¹⁸ Tondo natenda, Ndi tabongule? E, bongule, Iyuki liabo liabalangene mu kisi kinsania, Nu moki mabo aba ku bansania ba kisi.

¹⁹ Tondo natenda, Ndi balsalele tabamenyinine? Mose alingile kutenda bune, Nkababika mutima wa lugi ku babo beteli kilongo, Ku kilongo kiteli na bumenyinino nkamongia.

²⁰ Tondo Yesaya abede na ngini, nu atendile bune, Namonekile na babo batandondaga; Nalolesezibue ku babo batambuzagia.

²¹ Tondo ku balsalele atendile bune, Busi bunsania nalambizie maboko mane ku bantu beteli na luanzo, nu banani.