Balomo 1 - Nouveau Testament en Kilega

Mukanda Wasingaga Paolo ku baLomo.

¹ Paolo, mukobe wa Yesu Klisto, wamaninue buno abe musingua, wasombuedue kusambala musagu musoga wa Kalaga,

² wali­ngile kulaga ku tunua tua balengania bage mu masanzo masililila,

³ ku musagu wa Muana wage, wabutilue mu kikanga kia Davidi ku lukita lua mubili,

⁴ wamaninue Muana wa Kalaga mu magala, ku muuza wa bulili, nu kuiyukilo ku bakuzi, Yesu Klisto Monia weitu,

⁵ kubuno mueli tuakitilue mponga nu busingua, buno baBilongo bansania babe na luanzo ku bukatizio, ku kabamba keizina liage;

⁶ mu babo nuinyue muse muamanua na Yesu Klisto:

⁷ ku bansania beli mu Lomo, batundua ba Kalaga, bamaninue buno babe basuagibua: Mponga zibe kumuli nu bubobelelo bukutukaga ku Kalaga Tateisue nu Mukota Yesu Klisto.

Paolo Ekukengela Kubamonako.

⁸ Kulinga, nkusimaga Kalaga wane mu Yesu Klisto ku kabamba keinyu bansania, kubuno bukatizio bueinyu bukulumbibua, na bantu bansania ba kisi.

⁹ Kubuno mulongeki wane eli Kalaga, unkukitila mu mutima wane mu musagu musoga wa Muana wage, buno nkumukengelaga mu masego mane

¹⁰ buno, nivue kumuli ndi Kalaga esanania lugendo luane.

¹¹ Kubuno nili na malima nunse kumumonako, nivuame kumukasa lukaso lua muuza, buno mukokomene;

¹² buno, tulindaniazi muntu na muntu ku buka­tizio bua munyage, bueinyu nu buane.

¹³ Tondo mibuto zane, nsikutunda muibilile buno, mambizi meingi natundaga kuvua kumuli (tondo nabigenue aba nu kano kaluma) buno nibe na biguma munkatini mueinyu, anga bundi nabio mu bango baBilongo.

¹⁴ Nili na nsombi ku baGeleka, nu lingo ku baBilongo bansania, ku beli na menge nu lingo ku beteli na menge.

¹⁵ Ku bubuno, kundi nili kayikayika kusambala musagu musoga aba kumuli inyue beli ku Lomo.

Musagu Musoga wa Bulili bua Kalaga.

¹⁶ Kubuno nsili na nsoni ku musagu musoga: kubuno uli magala ma Kalaga aba ku lonio ku unsania wakatizia; kulinga ku ba Yuda, nu lingo ku baGeleka.

¹⁷ Kubuno kuisanana kua Kalaga kuku­bisulua mugo kutukila bukatizio aba ku bukatizio: anga buasa­nzilue bune, Wisanana akalama ku bukatizio.

Bongua bua Kalaga ku Buagi bua Bantu.

¹⁸ Kubuno Kalaga wa muigulu akongelua babo bansania be­kumusomba nu babo tabakukita buisanana, babo bekubigia bulili na bubi buabo;

¹⁹ kubuno misako za Kalaga zikumenyininua mubeli nunse; kubuno Kalaga abalolesiziezo.

²⁰ Kubuno misako zage zitamonekagako kutukila kuba kua kisi kano kaluma zisa­monekako, nu kumenyininua ku bibumbua bingi buno, magala mage tamanakuzinda nu buKalaga buage; kububo tabanavuama kuibingia:

²¹ kubuno, gabamenyinine Kalaga, tabamuganuine anga eli Kalaga, nu tabamusimine; tondo beikotezie mu makengelo mabo, nu mitima zabo za bukongolo zenizibue.

²² Beitendaga buno beli na menge, babede bikongolo,

²³ nu bagalukizie lutanuno lua Kalaga utanakubiga ku lukita lua kisusania kia bantu bakubiga, nu kia tuzoni, nu nyama za magulu manazi, nu bikugelegeta.

²⁴ Ku kabamba kako Kalaga abasigile mu ntundo za mitima zabo buno bayange nsese aba kubigania mibili zabo:

²⁵ kubuno bagalukizie bulili bua Kalaga ku buza, nu bakumbamine nu kukitila kibumbua ku kiziki kia Mubumbi, ukuganunagua ku nkiko zitana­kuzinda. Amena.

²⁶ Ku kabamba kako Kalaga abasigile bayange ntundo zabo za nsoni: nu bakikulu babo bagalukizie lukita lua bumba ku lulo luteli lua bumba:

²⁷ nu bamulume basigile bumba bua bakikulu, nu batundene buabo buabo, bamulume na bamulume bakitile butatunganana, nu bakataga bebenyene lukalilo luatananina na makitilo mabo.

²⁸ Nu anga bubasombile kuba na Kalaga mu bumenyinino buabo, Kalaga abasigile bayange bumenyinino buabiga, bakite buteli busoga;

²⁹ beiyeide na kutimba kua lukita na lukita, mibi, kutonia, bubi, lugi, buiti, nsake, buengelezi, misona, bagambi,

³⁰ bakandisia, basombi ba Kalaga, beli na kabenga, beli na luikotio, beiganuzi, balongeki ba bitondo bibi, batanza bababuta,

³¹ beteli na bumenyinino, beiti beidagano, batakutunda ba kuabo, beteli na kiombo,

³² babo beizi lusungio lua bulili lua Kalaga, buno bakukita bubo batananina kukua, bekukita bubo, aba ta bubo tugu, tondo lingo bekuitabizia babo bekukita bubo.