Bakolosai 4 - Nouveau Testament en Kilega

¹ Bakota, kitilazi bakiti beinyu bulili nu buisanana; menyazi buno muli na Mukota muigulu.

Kumbaminazi Kalaga Nkungu Insania.

² Segazi na komanizia, nu kesiazi ntende mu masego, nu simazi;

³ tusegelazi nuisue, buno Kalaga atuigulile luibi ku musagu wage tutende kakungu ka Klisto, ku kabamba kako nakandilue;

⁴ buno nikasambale anga buantunganana kutenda.

⁵ Endazi na menge kubabo batakatizia, ikokomeziazi bindi binsania.

⁶ Kutenda kueinyu kusuage bindi binsania, nu kuganunue nunse, mumenye lukita lumuatunganana kuakula muntu na muntu.

Paolo Ekubasingila Bango baKlisto.

⁷ Tukiko, mubuto wane, unatunda, wozo mukiti u mukatizia muida wane mu Mukota amusambalile misagu zane insania:

⁸ na­musinga kumuli buno mumenye misagu zeitu, nu kubobelezia mitima zeinyu;

⁹ gamozi na Onesimo, mubuto wane mukatizia nu mutundua, muntu wa kueinyu. Bamusambalile musagu unsania wa gano.

¹⁰ Alisitako unakandilue nage amusambizia, nu Malako, mubuto wa Balanaba (kubuno namusambalide misagu zage; nu ndi avua kueinyu, nti muamusekela),

¹¹ nu Yesu wamanagua Yoseto, nu babano u bamonesibua; umpanga babano ubankukitaga nabo mulimo umozi wa bukota bua Kalaga, nubo bambobelezizie.

¹² Epapulo, muntu wa kueinyu, mukobe wa Yesu Klisto, amu­sambizia, ekumusegela bindi binsania na komanizia, buno musililile nu mube na kilemanizio nunse mu kusombola kunsania kua Kalaga.

¹³ Kubuno nizi misako zage, buno amutunda nunse, nu babo bango beli ku Laodekia, nu babo bango beli ku Eliopolo.

¹⁴ Luka, wozo musakizi mutundua, nu Dema bamusambizia.

¹⁵ Nsambiziazi mibuto zane zili ku Laodekia, nu Numpa, nu ekelezia lili mu numba zabo.

¹⁶ Ndi muasila kusoma mukanda wono, nti muagusomia mu ekelezia lia Laodekia; nu wozo wa Laodekia nti muagusoma.

¹⁷ Bulazi Akipo bune, Alange mulimo wozo wakasilue na Mukota, agusililizie.

¹⁸ Samba kumuli nne Paolo nowasanza. Kengelazi buno nakandua. Mponga zibe kumuli.