Bakolosai 3 - Nouveau Testament en Kilega

¹ Umpanga ndi muayukile na Klisto, londazi bitondo bili kuigulu, gago gekile Klisto ku kuboko kuidume kua Kalaga.

² Kengelazi bitondo bili kuigulu, ta bitondo bili mu kisi.

³ Ku­buno muakule nu kalamo keinyu kabisilue na Klisto mu Kalaga.

⁴ Gamoneke Klisto, we uli kalamo keitu, ugago nuinyue muamoneke nage mu lutanuno.

Sigazi Misako Mibi, nu Muyange Misako Misoga za Kalaga.

⁵ Umpanga musige misako zeinyu mibi zili mu kisi: butazi, nu nsese, nu makengelo mabi, nu lutundo lubi, nu kutonia, ukuku­mbamina nkisi;

⁶ ku kabamba ka bubuno Kalaga akongelua babo bekunana:

⁷ nuinyue mualingaga kukita misako zeno;

⁸ tondo kano kaluma nuinyue lekanukazi na misako zeno: bongoa, nu kasungu, nu miango, nu bubi, nu kuililika, nu tamulingane:

⁹ tamu­ekane buza; kubuno muasigile kukita misako za bumba bua buagi,

¹⁰ nu muse na misako misoga, zikusuaga mu bumenyinino, nu zikususania wozo wamubumbile:

¹¹ takuli muGeleka aba mu Yuda, kumonesibua aba kutamonesibua, mugeni, muBilongo, mukandua, mukandulua, tondo Klisto eli binsania nu mu bansania.

¹² Umpanga, inyue basombolua ba Kalaga, nu basuagibua, nu batundua, mube na kiombo, nu mponga, nu kuibotia, nu busoga, nu nkiki;

¹³ muikalilane nu kusigililana, ndi muntu eli na mabingo kungo; bubo buamusigilide Klisto, bubo ububo nuinyue musigili­lane:

¹⁴ nu kuikitila nunse mube na lutundo, ukusililila.

¹⁵ Nu bubobelelo bua Klisto buangate mu mitima zeinyu, kubo mua­maninue mu mubili umozi; nu mube bantu bekusima.

¹⁶ Idagi lia Klisto likale mumuli nunse; mu menge mansania ku kuigisania nu kuanana ku nimbo za baYuda, nu nimbo za kuganuna, nu nimbo za muuza, nu muimbile Kalaga na mponga mu mitima zeinyu.

¹⁷ Nu kinsania kimukukita, ku kutenda aba ku makitilo, kitazi binsania muizina lia Mukota Yesu, nu simazi Kalaga Isi mueli.

Kitondo kia Bakikulu nu Beiba Babo, nu Bana Baheke nu Bababuta, nu Bakambi nu Bakota Babo.

¹⁸ Inyue bakikulu anzazi beiba beinyu, anga buasuagia mu Mukota.

¹⁹ Inyue beiba tundazi bakazi beinyu, tamube na kangonongono nabo.

²⁰ Inyue bana, anzazi bamubuta mu bitondo binsania, kubuno kitondo kikino kiatananina mu Mukota.

²¹ Inyue beisibo, tamulingie bana beinyu, banavua kukutua.

²² Inyue bakiti, anzazi bakota beinyu mu bitondo binsania; ta kukita tugu umpanga kungua beligo, anga bekutananizia bantu, tondo na mutima umozi, kubuno mukukua Mukota boba:

²³ kinsania kimukukita, kikitazi na mutima umozi, anga ku Mukota, aba ta ku bantu;

²⁴ menyazi buno mukakasua ku Mukota lukaso lua bupieni; kubuno mukukitila Mukota Klisto.

²⁵ Tondo we ukukita bubi, akakasua anga buakitaga: nu takuli kukutibua kua bantu.