Bakolosai 1 - Nouveau Testament en Kilega

Mukanda Wasingaga Paolo ku baKolosai. Paolo Ekubasambizia.

¹ Paolo, musingua wa Yesu Klisto ku kusombola kua Kalaga, nu Timoteo, mubuto weitu,

² ku basuagibua nu mibuto zeitu baka­tizia beli ku Kolosai: Mponga zibe kumuli nu bubobelelo bukutu­kaga ku Kalaga Tateisue.

Paolo Ekubogaboga ku Kalaga na Musagu wa baKolosai.

³ Tukusimaga Kalaga Isi wa Mukota weitu Yesu Klisto, tuku­musegelaga bindi binsania,

⁴ kubuno tungule musagu wa bukatizio bueinyu mu Klisto Yesu, nu lutundo lumuli nalo ku basuagibua bansania,

⁵ ku kabamba ka kilemanizio kimuabikidue isuku mu meigulu, musagu wakio muagungule wakalazi muidagi lia bulili lia musagu musoga,

⁶ wabasile kueinyu; anga buguli mu kisi kin­sania, nu ukukolama biguma nunse, anga buwitide kumuli, kutukila busi bumungule nu muamenyine mponga za Kalaga mu bulili;

⁷ anga bumuigisizibue na Epapulo muida weitu nu mutundua weitu, we uli kumuli mukiti u mukatizia wa Klisto,

⁸ uwatusamba­lide lutundo lueinyu mu Muuza.

Paolo Ekubasegela ku Kalaga.

⁹ Ku kabamba kakano nuisue, kutukila busi butungule, tatukulekela kumusegela nu tukutunda muizazibue na bumenyinino bua kusombola kuage mu menge mansania nu bumenyinino bua Muuza,

¹⁰ kitazi anga buatunganana ku Mukota nu kumutananizia nunse, ku kukolama biguma mu mulimo na mulimo musoga, nu kukula mu bumenyinino bua Kalaga;

¹¹ mulindibue na magala mansania, anga buli magala ma lutanuno luage, ku nkiki nu kuikalila mu mbo­gimbogi;

¹² simazi Tateisue watusuagizie buno tube na bupieni bua basuagibua mu kiengi;

¹³ watonezie ku kapilo, nu atukumuine nu kutuingizia mu bukota bua Muana wage wa lutundo;

¹⁴ mueli tuli na bukuluzi bueitu, nu isigililo lia misako za buagi bueitu

¹⁵ we eli kisusania kia Kalaga utakumonekako, nkula za bibumbua binsania;

¹⁶ kubuno binsania biabumbilue nage, bili mu meigulu nu bili ga kisi, bikumonekako nu bitakumonekako, ndi bili bisumbi bia bakota aba bukota aba buangato aba magala; binsania biabu­mbilue nage nu eibumbidebio;

¹⁷ nuwe abezaga nti binsania tabiba, nu binsania bialindibua nage.

¹⁸ Nuwe eli muangati wa mubili, u ekelezia; nuwe eli mutangi, alingile kutuka ku bakuzi; buno abe musondelezia wa binsania.

¹⁹ Kubuno buatananizizie Isi buno kuzindilizia kunsania kuikale mueli;

²⁰ nu mueli binsania biaku­lumanizibue nage, nu agomanizie binsania mu mikila zage ku muti wa magu; aba ndi binsania bili ga kisi, aba bili mu meigulu.

²¹ Nu­inyue, mualingaga kuba bulazi nu beiti mu bumenyinino bueinyu mu misako zeinyu mibi,

²² tondo kano kaluma amugomania mu mubili wage ku lukuo luage, buno mube basuagibua, geteli itondoki, geteli kubingua:

²³ ndi muikala tugu mu bukatizio, lindazi nu tamute­ngetenge, tamugalukibue nu kusiga kilemanizio kia musagu musoga gumungule, wasambedue ku bantu bansania beli mu kisi; ku bubuno nne Paolo nabede mukiti wago.

Paolo Ekusambala Musagu Musoga ku baBilongo.

²⁴ Kano kaluma nkubogaboga ku kubabalua kunkumubabalilua, nu nazindilizizie kuko kubabalua kuababedue Klisto ku kabamba ka mubili wage, uli ekelezia;

²⁵ nunne nabede mukiti walio, nu mulangi walio ku Kalaga anga bunakasilue ku kabamba keinyu, nizindilizie idagi lia Kalaga,

²⁶ nu kakungu kakano kabezaga kabisua wakalazi ku nkiko insania nu ku bibuti binsania tondo kano kaluma kabisulua ku basuagibua bage,

²⁷ Kalaga atundaga kuba­menesia buni buli bugumi bua lutanuno lua kakungu kakano ku baBilongo, u Klisto mumuli, kilemanizio kia lutanuno:

²⁸ musagu wage utukusambala, tukuana muntu na muntu nu kuigisia muntu na muntu mu menge mansania, buno tulusie muntu na muntu ku Kalaga buno asililile mu Klisto;

²⁹ nkuikokomezia ku kukita mulimo wage na magala mage makukitaga mundi bubibu.