Bagalatia 2 - Nouveau Testament en Kilega

¹ Nu gasilile miaka ikumi neinazi nendile lingo ku Yelusa­lema gamozi na Balanaba nu Tito.

² Nu natendilue buno nendeko nu nabasambalide musagu musoga wozo unkuigisia ku baBilongo tondo mu kakungu ku babo bekuganunua, ninavua embe nkuituma lubilo lua buliabulia, aba nitumine lubilo lua buliabulia.

³ Tondo Tito unabezaga nage, abezaga mu Geleka, ntasindikilue buno amonesibue:

⁴ nu ku kitondo kia mibuto za buza bengizizibue mu kakungu, babano beingide mu kakungu buno batitike kukandula kueitu kutuli nako mu Yesu Klisto, batubike ku bukobe:

⁵ tatuisi­gulizizie kubeli aba busi bumozi, buno bulili bua musagu musoga buikale neinyue.

⁶ Tondo babo bekuanzua buno beli bangati (babezaga banazi ta kitondo kiane; Kalaga ntakuanga kukutia kua bantu) natenda buno, babo banzagua tabantalikide kena:

⁷ tondo neibineibi, gabamonine buno bakasilue mulimo wa kusambala musagu musoga ku batamonesibua, anga bubo Petelo buakasilue wozo wa kusambala ku bamonesibua

⁸ (kubuno we wabikile Petelo buno abe musingua ku bamonesibua u wozo wambikile buno, nibe musingua ku baBilongo);

⁹ nu gabamenyine mponga zinakitilue, Yakobo nu Kefa nu Yoana bakengedue anga mango ma ekelezia lia Klisto, nne nu Balanaba batukasile mukono wa kusei­dume wa mugomio, buno isue tuende ku baBilongo, nubo bende ku bamonesibua;

¹⁰ tondo kitondo kimozi tugu buno, tukengele bazambi: nu kitondo kikino natundile nunse kukikita.

Bantu Bekubingibua Umpanga ku Bukatizio.

¹¹ Tondo Kefa gavule ku Antiokia, nendile nage miango, kubuno atananina lusungio.

¹² Kubuno gabede bantu bamozi batukaga ku Yakobo, nu aliaga na baBilongo; tondo gabavule, itonezie, idekanukizie nabo, akule babo bamonesibua boba.

¹³ Nu bango baYuda begalukizie nage mu buengelezi bubo; aba Balanaba alu­tilue na buengelezi buabo.

¹⁴ Tondo ganamonine tabakukita anga buli musagu musoga, natendile Kefa ku bansania bune, Ndi uwe uli muYuda nti wakita nkita za baBilongo, aba ta za baYuda, buni bukusengezia baBilongo kukita nkita za baYuda?

¹⁵ Isue tuli baYuda ku bumba, aba tatuli bagi anga baBilongo,

¹⁶ mumenye buno muntu ntekubingibua ku makitilo ma mulembe tondo ku bukatizio mu Yesu Klisto, isue tuakatizizie Yesu Klisto, buno tubingibue ku bukatizio mu Klisto, aba ta ku makitilo ma mulembe: kubuno ku makitilo ma mulembe takuli muntu unabingibua.

¹⁷ Tondo kungua isue tukulonda kubingibua mu Klisto, nti tuku­moneka kuba bagi, ndi Klisto eli mukiti wa buagi? Kilo, aba nunse.

¹⁸ Kubuno ndi nikukita lingo bitondo bibio binasigile, nti nili mukaguzi wa mulembe.

¹⁹ Kubuno ku mulembe nalekanu­kizibue na mulembe, buno nilame ku Kalaga.

²⁰ Natakilue gamozi na Klisto; tondo nkulama; aba ta nenyene lingo, tondo Klisto ukulama mundi; nu kalamo kankulama kano kaluma mu mubili, nkulama mu bukatizio bua Muana wa Kalaga, wantu­ndile, nu eikasene ku kabamba kane.

²¹ Nsikubigia mponga za Kalaga: kubuno ndi kuisanana kukuvua ku mulembe, kasi Klisto akule buliabulia.