Bagalatia 1 - Nouveau Testament en Kilega

Mukanda Wasingaga Paolo ku baGalatia. Paolo Ekubasambizia.

¹ Paolo, musingua (ta wa bantu, aba ntasingilue na muntu, tondo na Yesu Klisto, nu Kalaga Isi wamuyukizie ku bakuzi),

² nu mibuto insania beli gamozi nanne, ku maekelezia ma ku Galatia:

³ mponga zibe kumuli nu bubobelelo bukutukaga ku Kalaga Isi nu ku Mukota weitu Yesu Klisto,

⁴ wikasene wenyene ku kabamba ka misako za buagi bueitu, buno atonie ku kisi kikino kibi kia kano kaluma, anga buli kusombola kua Kalaga Tateisue:

⁵ aganunue ku nkiko na nkiko. Amena.

BaGalatia Basombile Musagu Musoga nu Batundile Ungo.

⁶ Nangama na bumuasasia kusiga wozo wamumanine mu mponga za Klisto nu kugalukila ungo musagu wa lungo lukita;

⁷ aba takuli ungo musagu musoga: tondo bantu bekumuzangiazangia, nu bekutunda kugalukia musagu musoga wa Klisto.

⁸ Tondo ndi isue, aba mugenzi wa kuigulu, ukamusambalila ungo musagu uteli wozo utuamusambalide, asuililue.

⁹ Anga bunalingile kutenda, nu kano kaluma nkutenda lingo, muntu unsania ndi amusambalila ungo musagu uteli wozo umuasambalidue, asuililue.

¹⁰ Kubuno kano kaluma ndi nkulonda bunene bua bantu, aba bua Kalaga? aba ndi nkutunda kutananizia bantu? songo natananizagia bantu, songo nsinabede mukobe wa Klisto.

Meigisia ma Paolo Matukile ku Yesu.

¹¹ Kubuno namumenesia, mibuto zane, buno, musagu musoga unasambede, ta wa lukita lua bantu.

¹² Kubuno nsiagusambalidue na muntu, aba nsigisizibue, tondo nagulolesizibue na Yesu Klisto.

¹³ Kubuno mungule ku musagu wa misako zane mu mpala za baYuda, anga bubo bunitide kubabazia ekelezia lia Kalaga, nu nalisungizie:

¹⁴ nunne nakulile mu mpala za baYuda kutinga beingi ba lugi luane mu kilongo kiane, nasasizie kumenya misumo za batateisue.

¹⁵ Tondo Kalaga, ansombuede ganabezaga nkili munda za mmane, nu amanine ku mponga zage,

¹⁶ kumenesia Muana wage mundi, buno nisambalile baBilongo musagu wage; nsiakalile luango na bango bantu:

¹⁷ aba nsiendile ku Yelusalema ku babo babezaga basingua batangi; tondo nendile yiliyili ku Alaba; nu nasubizie lingo ku Dameseke.

¹⁸ Ububo gasilile miaka esatu nendile ku Yelusalema kumonana na Kefa, nikede kuage bindi ikumi na bitano.

¹⁹ Tondo nsiamo­nine kungo musingua, umpanga Yakobo muto wa Yesu.

²⁰ Nu bitondo binamusanzila, unguililazi, ku Kalaga, nsikueka buza.

²¹ Umpanga nendile ku bisi bia Sulia nu Kilikia.

²² Tondo nsiamoneneko na maekelezia ma Yudaya mabezaga mu Klisto:

²³ tondo bongule tugu buno, we watusungagia wakalazi kano kaluma ekusambala bukatizio bubo buasungagia wakalazi;

²⁴ nu baganuine Kalaga ku kabamba kane.