Bafilipo 2 - Nouveau Testament en Kilega

BaKlisto Besigulizie Anga Buisigulizizie Klisto.

¹ Umpanga ndi kuli kuanana mu Klisto, ndi kuli kubobelezania kua lutundo, ndi kuli kugomia kua Muuza, ndi kuli mponga nu kiombo,

² mbogiazimbogiazi nunse, mube na makengelo mamozi, na lutundo lumozi, na mutima umozi;

³ tamukite kitondo kinsania ku miango aba ku luikotio, tondo ku kubota, na muntu na muntu akutie munyage kutinga buikutia;

⁴ muntu na muntu ntakengele bitondo biage wenyene, tondo muntu na muntu bitondo biongo.

⁵ Mube na makengelo mamo mumuli anga bumabezaga mu Klisto Yesu:

⁶ kubuno we abezaga Kalaga, tondo ntakengede buno kuko kulingimana na Kalaga kuli kena.

⁷ Tondo eikunguide lutanuno, abede anga mukobe, abede na kisusania kia muntu;

⁸ nu amonekile na lukita anga lua muntu, nu eisigulizizie, anzile aba ku lukuo lua muti wa magu.

⁹ Ku bubuno Kalaga amukutizie nunse, amuinikile izina liatinga meina mansania;

¹⁰ buno kuizina lia Yesu izu neizu likakomua, lia binsania bia muigulu nu bia mu kisi nu bia kunsi kua kisi,

¹¹ nu lulami na lulami lukeitabizia buno, Yesu Klisto eli Mukota, ku lutanuno lua Kalaga Tateisue.

BaKlisto Bakite Busoga.

¹² Ububo, batundua bane, anga bubo bumuanzaga bindi bin­sania, nkungu zinabezagako, tondo ndi nsiliko, zindiliziazi lonio lueinyu, mukue boba nu mugilimine;

¹³ kubuno Kalaga ukukita mumuli, kumukasia kukita anga buakutunda.

¹⁴ Kitazi binsania geteli manungunungu nu miango:

¹⁵ buno mube bana ba Kalaga beteli na kabalibango, nu buengelezi, nu mulubu mu kibuti kibi, nu kialubikana, mubeli mukumoneka kuba kiengi mu kisi,

¹⁶ kun­gua muakokomezia idagi lia kalamo; neikake mu busi bua Klisto, buno nsitumine lubilo buliabulia aba nsiakitile mulimo buliabulia.

¹⁷ Tondo ndi nkuikasana buno nibe kisansa ku bukatizio bueinyu, nti nkubogaboga nunse, nkubogaboga neinyuebansania:

¹⁸ nuinyue bubo mubogeboge, nu bogazibogazi anga bunkubogaboga.

Paolo Ekubasingila Timoteo nu Epapulodito,

¹⁹ Tondo nkulemanina mu Mukota Yesu kusasia kumusingila Timoteo, buno nibogeboge kungua nungua ku misagu zeinyu.

²⁰ Kubuno nsili nongo muntu undi nage bumenyinino bumozi, una­mulanga lebelebe mu bitondo bieinyu.

²¹ Kubuno bansania beku­londa biabo tugu, tabia Yesu Klisto.

²² Tondo muizi lukumu luage, nu nakitile mulimo nage ku kabamba ka musagu musoga, anga muana neisi.

²³ Umpanga nkulemanina kusinga wono, nti amenya bunita:

²⁴ tondo nkulemanina mu Mukota buno nasasie kuvua nenyene.

²⁵ Tondo nakengede kumusingila Epapulodito, mubuto wane nu utukukitaga nage mulimo umozi, nu mukoloboyo gamozi nanne, nu musingua nu mukiti weinyu ku kabamba ka kuiyanina kuane;

²⁶ kubuno amukuilaga malima nunse, nu abezaga na kabebe kanene, kubuno mungule buno abezaga na lusambo:

²⁷ kubuno abe­zaga ese buigi na kulekana: tondo Kalaga amukuilide kiombo; aba ta we wenyene, tondo nunne, bubo, nsibe na kabebe kankanka.

²⁸ Ku bubuno namusingile mu mbogimbogi nunse, buno gamuamumo­neko lingo, nti muabogeboge, nunne kabebe kane nti kakokoke,

²⁹ Umpanga musekelazi mu Mukota na mbogimbogi nunse; nu muanze bantu beli anga wono:

³⁰ kubuno ku kabamba ka mulimo wa Klisto abezaga ese buigi na kulekana, ntalangilekalamo kage, buno asililizie mulimo wankitilaga gamutabezagago.