Baefeso 5 - Nouveau Testament en Kilega

Mutabange Anga Bana ba Kiengi.

¹ Umpanga mube bayangi ba Kalaga anga bana batundua,

² mutabange mu lutundo, anga buatundile Klisto, nu eikasene ku kabamba keitu, kuba lukaso nu kisansa kia nsunu nsoga ku Kalaga.

³ Tondo butazi, nu mibi insania, aba kutonia, tabi­tekulue kumuli nunse, anga buatananina basuagibua;

⁴ aba nsoni, aba kusambala kua bukongolo, aba nguza, bibino bitatananina; tondo buakulungana kuganuna.

⁵ Kubuno muizi nunse, takuli kitazi, aba ekukita mibi, aba ekutonia, aba mukumbamizi wa nkisi, ukapiena mu bukota bua Klisto nu Kalaga.

⁶ Muntu ntamue­ngelele mu bitondo biteli na buisulilua: kubuno ku kabamba kabo Kalaga akongelua babo bekunana.

⁷ Umpanga tamugomie nabo;

⁸ kubuno wakalazi muabezaga mu kapilo, tondo kano kaluma museli mu kiengi mu Mukota; tabangazi anga bana ba kiengi

⁹ (kubuno misako za kiengi zili mu busoga bunsania nu kuisanana nu bulili),

¹⁰ kitazi bunatananizia Mukota;

¹¹ nu tamugomie na makitilo ma kapilo matasuaga, tondo mumazugile;

¹² kubuno bitondo bibino bikukitua nabo ku lumbisombiso bili nsoni nunse aba kubitenda.

¹³ Tondo bitondo binsania bitasuaga bikumenyua na kiengi; kubuno kinsania kikumenyua kili kiengi.

¹⁴ Ku bubuno bukutendua bune, Yuka uwe wiyombeka ku tulo, uyuke kutuka ku bakuzi, nu Klisto akukase kiengi.

¹⁵ Lolazi nunse ku lukita lumukutabanga, tanga bantu beteli na menge, tondo anga beli na menge;

¹⁶ ikokomeziazi bindi binsania, kubuno bindi bibino bili bibi.

¹⁷ Ku bubuno tamube bikongolo, tondo bekumenyinina buni buli kusombola kua Mukota.

¹⁸ Nu tamukue na maku, mumo muli bitondo bia mulubu, tondo muiyazibue na Muuza Wasililila;

¹⁹ mutendane ku nimbo za baYuda, nu nimbo za kuganuna, nu nimbo za muuza; muimbe nu muganune Mukota mu mitima zeinyu,

²⁰ nu kusima Kalaga Tateisue bindi binsania ku bitondo binsania muizina lia Mukota weitu Yesu Klisto;

²¹ muanzane mu boba bua Klisto.

Bamulume Batunde Bakikulu Babo Anga Buatundile Klisto Ekelezia.

²² Inyue bakikulu anzazi beiba beinyu, anga bumukuanzaga M ukota.

²³ Kubuno wamulume eli muangati wa mukikulu, anga nuwe Klisto bueli muangati wa ekelezia, nuwe eli Monia wa mubili.

²⁴ Anga bukuanza ekelezia lianza Klisto, ububo nubo bakikulu banze beiba babo mu kitondo na kitondo.

²⁵ Inyue bamulume, tundazi bakikulu beinyu, anga buatundile Klisto ekelezia, nu eikasene ku kabamba kalio;

²⁶ buno alisuagie, nu kulisuga ku mazi muidagi,

²⁷ buno eidusizie lutanuno ku ekelezia, liteli na kabalibango aba kusunana aba kingo kitondo anga bubuno; tondo lisililile, liteli na katiti.

²⁸ Bubo ubuatunganana bamulume batunde bakikulu babo anga mibili zabo bo benyene. We watunda mukikulu wage nti eitunda we wenyene:

²⁹ kubuno takuli muntu ukuisomba wenyene; tondo ekuikunga, nu ekuidisia anga buku­kunga Mukota ekelezia;

³⁰ ku kabamba kako tuli biganza bia mubili wage.

³¹ Ku kabamba kako muntu akasiga isi nu nina, nu alandane na mukikulu wage; nubo babili babe mubili umozi.

³² Bubuno buli kakungu kanene: tondo nkutenda ku kitondo kia Klisto nu ekelezia.

³³ Tondo muntu na muntu kumuli atunde mukikulu wage anga bueitunda wenyene; nu mukikulu nteide kuanza iba wage.