Baefeso 4 - Nouveau Testament en Kilega

BaEkelezia Bakite Bumozi mu Musagu Wage.

¹ Kububuno nne, mukandua wa Mukota, nkumusengezia buno muende anga bumuamaninue,

² ku kubota kunsania nu ku bukebuke, na komanizia, mubindikilane bueinyu bueinyu mu lutundo;

³ mukokomezie na magala kuba umozi mu Muuza mu kikando kia bubobelelo,

⁴ Kubuno kuli mubili umozi, nu Muuza umozi, anga bumuamaninue mu kilemanizio kimozi kia mubila weinyu;

⁵ Mukota umozi, bukatizio bumozi, bubatizio bumozi,

⁶ Kalaga umozi, Isi wa bansania, uwangata bansania, nu ukukukia bansania, nu mu bansania.

Kalaga Akasile Muntu na Muntu mu Ekelezia Mulimo Wage.

⁷ Tondo nawe nawe wa kutuli na wakitilue mponga ku lukaso lua Klisto.

⁸ Ku bubuno atendile bune, Gabakamine kuigulu, akanduide bakandua, Akasile bantu nkaso.

⁹ (Umpanga, kitondo kikino, Abakamine, u buisulilua bukizi ndi ta buno, alingile kugela aba nu biziki bia munda mua kisi?

¹⁰ We wagelile u we wabakamine ku meigulu mansania, buno akukizie binsania.)

¹¹ Nuwe wenyene akasile bamozi babe basingua; nu bango babe balengania; nu bango, babe basambazi; nu bango babe balangi nu basozi;

¹² ku kitondo kia kusililizia basuagibua, ku mulimo wa kuigisia, ku kulindia mubili wa Klisto:

¹³ aba nu bansania tukaba umozi mu bukatizio, nu kumenyinina nunse muana wa Kalaga, kuba anga muntu mukulu munene, aba nu kilindiko kia kima kiasililila kia Klisto:

¹⁴ bubuno tatube lingo anga bana, kugingibuagingibua nu kuekua na lumpumpu lunsania lua meigisia, mu lukita lua menge ma bantu, mu buengelezi, kukuya­nga lukita lubi;

¹⁵ tondo tukokomezie bulili mu lutundo, buno tukule mu bitondo binsania mu we uli muangati, u Klisto;

¹⁶ mu wono mubili unsania ukukulumanibua nu kulibatizibua ukukula ku ngiginyo insania ku magala mabeganibua ku kindi na kindi, buno widindie mu lutundo.

Bantu ba Kalaga Bakule mu Misako Misoga.

¹⁷ Umpanga bubuno bunkutenda, nu kulongeka mu Mukota, buno kutukila kano kaluma tamuende anga bukuenda baBilongo mu makengelo mabo ma buliabulia,

¹⁸ nu bumenyinino buabo bua­bigizibue babandukene na kalamo ka Kalaga, ku kabamba ka buko­ngolo buabo, nu ku kabamba ka bubibu bua mitima zabo;

¹⁹ babo tabongule kubabazibua basila kuikasana ku bitondo bibi kukita lukita na lukita lua nsese mu nduma.

²⁰ Tondo inyue tamuigile bubuno ku musagu wa Klisto;

²¹ ganaba ndi muanunguleko, nu muigisizibue mueli anga buli bulili mu Yesu:

²² sigazi kukita misako za bumba bua wakalazi, u bumba bua buagi, ukubigibua kukuyanga ntundo za buengelezi;

²³ nu mube bato mu bumenyi­nino bueinyu,

²⁴ nu muzuale muntu muto, wabumbilue ku lukita lua Kalaga mu kuisanana nu kusililila kua bulili.

²⁵ Umpanga menkazi buza, mutende buligo na muntu na muntu na munyage: kubuno tuli biganza, na kiganza na kiganza kili ku kingo.

²⁶ Onguazi, tondo tamuage; bongoa bueinyu tabuike kuigolo:

²⁷ aba tamusigelele liabo u Satana.

²⁸ Wozo wibile nteibe lingo; tondo akite mulimo, agukite wenyene wozo uli musoga, amone kanakasa wozo ukuiyaninako.

²⁹ Kitondo kinsania kili kibi takituke mu tunua tueinyu, tondo kili kisoga kia kulindia bango anga bubakuiyanina, kibogiebogie babo bekukiunguako.

³⁰ Aba tamuite Muuza Wasililila wa Kalaga na kabebe, kueli mua­bikilue kamenyikilo aba nu ku busi bua bukuluzi.

³¹ Kangono­ngono, nu bukali, nu bongoa, nu mulubu, nu bilingano bituke kumuli, nu kiango kinsania:

³² nu kitanazi mponga, bakuilazi kiombo, musigililane, anga buamusigilide Kalaga mu Klisto.