Baefeso 3 - Nouveau Testament en Kilega

Kalaga Engizizie Paolo mu Mulimo wa Kusambala ku Musagu Wabezaga Wabisua.

¹ Kubuno ku kabamba kakano nne Paolo, mukandua wa Yesu Klisto ku kabamba keinyu inyue baBilongo,

² ndi mungule musagu wa nkiko za mponga za Kalaga gunakasilue ku kabamba keinyu;

³ nu buno, ku kulolesibua namenesezibue kakungu kako anga bunalingile kusanza mu moki mamozi,

⁴ kumamo mamu­kusoma muamenyinine bumenyinino buane mu kakungu ka Klisto;

⁵ katamenesezibue wakalazi muingo nkiko ku bantu, anga kano kaluma bualolesizibue ku basingua bage basuagibua, nu balengania mu Muuza;

⁶ buno baBilongo, bapiene neisue, nu tube mubili umozi, nu babe neisue muidagano liage lili mu Klisto Yesu mu musagu musoga.

⁷ Kugo nabikilue mukiti, ku kukasua lukaso lua mponga za Kalaga zinakitilue ku magala mage.

⁸ Tondo nne, nili mukeke kutinga wozo uli mukeke wa ku basuagibua bansania, nakitilue mponga buno, nisambalile baBilongo bugumi bua Klisto butanali­ndikua;

⁹ ku kumenesia bantu bansania buno bamenye nkiko nkizi za kakungu kako, uko kutukila kulinga kabisilue mu Kalaga, wabumbile binsania;

¹⁰ bubuno, kano kaluma mu ekelezia, menge ma Kalaga meli ma nkita ningi mamenyininue na makota nu bua­ngato bua meigulu.

¹¹ Kulongeka kutanakuzinda kualongekile mu Klisto Yesu Mukota weitu:

¹² ku bukatizio mueli tuli na kilemanizio kukunda Kalaga.

¹³ Nkumusengezia buno tamutambe ku mbabazio zinkumubabalilua, zili lutanuno lueinyu.

Paolo Ekusegela baEfeso ku Kalaga.

¹⁴ Ku bitondo bibino nakoma mazu mane ku Tatane,

¹⁵ kuizina liage na kikanga na kikanga muigulu nu mu kisi kikumanua,

¹⁶ amu­kase anga bubo buli bugumi bua lutanuno luage, mube na magala mu Muuza wage mu makengelo;

¹⁷ buno Klisto ikale mu mitima zeinyu ku bukatizio; buno mulinde mu lutundo,

¹⁸ mumenyinine bumozi na basuagibua bansania buni buli bungulu nu bulazi nu kusakama nu buzindu,

¹⁹ nu kumenyinina lutundo lua Klisto buno luatinga bumenyinino bunsania, buno mukuke ku kukuka kunsania kua Kalaga.

²⁰ Umpanga aganunue we ukuvuama kuitila kukita nunse kutinga binsania bitukusega aba bitukukengela, anga buli magala makukitaga mutuli,

²¹ bubo aganunua mu ekelezia nu mu Klisto Yesu aba nu bibuti binsania ku nkiko na nkiko. Amena.